Ǵylym tabysty bolýy úshin ekonomıkamen sabaqtasyp otyrýy tıis — Máýlen Áshimbaev
ASTANA. KAZINFORM — Parlament Senatynyń Tóraǵasy Máýlen Áshimbaev búgin Almatyda ótken «Ǵylym jáne tehnologııalyq saıasat týraly» zańdy iske asyrý máselelerine arnalǵan dóńgelek ústelge qatysty. Bul týraly Senattyń baspasóz qyzmeti málim etti.
Іs-shara barysynda osy saladaǵy ulttyq zańnamaǵa engizilgen túzetýler talqylandy. Sondaı-aq qatysýshylar negizgi mindetterdi belgilep, ǵylymdy damytý, ınnovatsııalardy engizý jáne eldiń básekege qabilettiligin arttyrý jóninde óz usynystaryn aıtty. Sapar aıasynda Palata Spıkeri qaladaǵy birqatar uıymnyń sarapshylarymen jáne eńbek ujymdarymen de kezdesti.
Dóńgelek ústeldi ashqan Máýlen Áshimbaev Memleket basshysynyń tapsyrmasymen sońǵy jyldarda ǵalymdardy qoldaýǵa arnalǵan mańyzdy bastamalar iske asyrylyp jatqanyn jáne ǵylym salasynda, onyń ishinde zańnamalyq deńgeıde aýqymdy ári júıeli ózgertýler qolǵa alynǵanyn tilge tıek etti. Senat Tóraǵasy atap ótkendeı, Qazaqstan Respýblıkasynyń Prezıdenti janyndaǵy Ulttyq Ǵylym akademııasyna memlekettik mártebe berý salanyń ilgerileýine, ǵylymı ekojúıeni nyǵaıtýǵa jáne ǵalymdardyń áleýetin arttyrýǵa jol ashqan mańyzdy qadam boldy.
— Prezıdentimiz Qasym-Jomart Kemeluly Toqaev elimizde ǵylymdy damytý máselesine árdaıym basa mán berip keledi. Shyn máninde, bul sala elimizdi damytý jolynda strategııalyq mańyzǵa ıe. Sondyqtan Memleket basshysy, Ulttyq ǵylym akademııasyna memlekettik mártebe berdi. Bul sheshim otandyq ǵylymnyń ilgerileýine jańa múmkindikter bergeni sózsiz. Búgingi jıynǵa otandyq ǵalymdar qatysyp otyr. Sizder ulttyq ǵylymdy jetildirýge, ınnovatsııalyq jobalardy iske asyrýǵa jáne zertteýshilerdiń jańa býynyn daıarlaýǵa zor eńbek sińirip júrsizder. Sol arqyly Qazaqstannyń básekege qabilettiligin arttyrýǵa jáne eldiń qarqyndy damýyna aıtarlyqtaı úles qosyp kelesizder, — dedi Máýlen Áshimbaev.
Sonymen qatar Senat Tóraǵasy ǵylym Qazaqstannyń basty aktıvteriniń biri jáne ulttyq qaýipsizdiktiń, ekonomıkalyq turaqtylyq pen áleýmettik ál-aýqattyń mańyzdy elementi ekenin aıtty. Osyǵan baılanysty ǵalymdar men sarapshylar qoǵamdastyǵynyń, memlekettik organdardyń, jurtshylyq pen depýtattardyń jáne basqa da múddeli taraptardyń kúsh-jigerin jumyldyrýdy qajet etetin mańyzdy mindetterge mán berildi.
Ǵylymdy damytý jáne eldiń básekege qabilettiligin arttyrý jónindegi mindetter men usynystardy talqylaý barysynda qatysýshylar ǵalymdardy áleýmettik qoldaý máselesine erekshe toqtaldy. Máýlen Áshimbaev bul rette ǵalymdar da óz tarapynan ǵylymı zertteýler eldiń básekege qabilettiligin arttyrýǵa yqpal etýi úshin aıanyp qalmaýǵa tıis ekenin jáne jahandyq trendter men ekonomıkalyq strategııa eskerilýi kerektigin atap ótti. Naqty aıtqanda, agrarlyq ǵylym, ekologııa, sý jáne resýrs únemdeý, hımııa jáne munaı-gaz ónerkásibindegi shıkizatty óńdeý, balamaly jáne atom energetıkasyn damytý sııaqty salalar nazarda bolýǵa tıis. Sondaı-aq jasandy ıntellekt, bıotehnologııa, zamanaýı medıtsına, gendik ınjenerııa jáne ǵarysh salasynyń róli men bolashaǵy da keńinen sóz boldy.
— Adamı kapıtal — ǵylymı damýdyń negizi. Sondyqtan ǵalymdardy jáne ǵylymdaǵy jas býyndy jan-jaqty qoldaý úshin qajetti jaǵdaı jasalyp, júıeli jumys júrgizilip jatyr. Memleket basshysy Qasym-Jomart Kemeluly Toqaev ǵylymdy qarjylandyrýǵa úlken kóńil bólip otyr. Sonyń nátıjesinde sońǵy tórt jyldyń ishinde ǵylymdy qarjylandyrý 3 esege ulǵaıdy. Osy oraıda mundaı jan-jaqty qoldaý ǵalymdardyń ózderine de úlken jaýapkershilik júkteıtinin atap ótken jón. Elimizdiń sapaly damýynda ǵylymnyń úlesin arttyrý asa mańyzdy. Ǵylym tabysty bolýy úshin ol ekonomıkamen jáne qoǵammen sabaqtasyp otyrýǵa tıis. Sondyqtan búgingi kezdesýde aıtylǵan ıdeıalar men usynystar muqııat zerdelenip, Senattyń aldaǵy zańnamalyq qyzmetinde eskeriledi», — dedi Senat Tóraǵasy.
Іs-sharaǵa Parlament depýtattary jáne Almaty qalasynyń basshylyǵymen qatar ǵalymdar, zııaly qaýym ókilderi, QR Prezıdenti janyndaǵy Ulttyq Ǵylym akademııasynyń músheleri, ǵylymı-zertteý ınstıtýttary men ortalyqtarynyń ǵalymdary, memlekettik organdardyń qyzmetkerleri jáne basqa da múddeli taraptar qatysty.
Máýlen Áshimbaev Almaty qalasyndaǵy sarapshylar qoǵamdastyǵynyń ókilderimen de arnaıy kezdesti. Olarmen ózara is-qımyldy nyǵaıtý Palata úshin Memleket basshysynyń reformalaryn sapaly iske asyrýdy qamtamasyz etý jolynda aıryqsha ról atqarady.
— Parlament pen analıtıkalyq qoǵamdastyq arasyndaǵy syndarly dıalog jaı ǵana pikir almasý emes, bul — zań shyǵarý protsesin jaqsartýdyń mańyzdy tetigi. Prezıdentimiz Qasym-Jomart Kemeluly Toqaev el damýynyń aldaǵy jyldarǵa arnalǵan strategııalyq baǵdaryn belgilep berdi. Qazaqstan zamanaýı tehnologııalardy belsendi damytý, ınvestıtsııalar tartý jáne álemdik baǵa qalyptastyrý tizbegine qosylý arqyly básekege qabiletti tsıfrlyq ekonomıkany qurýǵa tıis. Bul mindet bizden sheshýshi qadamdardy, túrli daǵdylarǵa ıkemdilikti, kúrdeli syn-qaterlerge daıyn bolýdy jáne eldiń analıtıkalyq áleýetin kúsheıtýdi talap etedi, — dep, Senat Spıkeri osy baǵyttaǵy mańyzdy mindetterge toqtalyp ótti.
Sapar barysynda Palata Tóraǵasy Abaı atyndaǵy daryndy balalarǵa arnalǵan respýblıkalyq mamandandyrylǵan orta mektep-ınternatynyń qurylys jumystarymen tanysty jáne QR Prezıdenti janyndaǵy Qazaqstan Respýblıkasy Ulttyq Ǵylym akademııasynyń ǵımaratyna bardy.
Sonymen qatar depýtattar poshta baılanysyna qatysty buǵan deıin Senat maquldaǵan zańnyń iske asyrylýyna monıtorıng júrgizý aıasynda «Qazposhta» AQ halyqaralyq mýltımodaldi logıstıkalyq habynyń ujymymen kezdesti. Almaty oblysynda jumys istep turǵan qoıma kesheni elektrondyq saýdanyń ósýin arttyrýdy, sol arqyly óńirlerde kásipkerlikti damytý úshin biregeı múmkindikter ashýdy jáne Qazaqstannyń Ortalyq Azııanyń logıstıkalyq haby retindegi ustanymyn nyǵaıtýdy kózdeıdi.
Eske sala keteıik, buǵan deıin Máýlen Áshimbaev resmı saparmen Qytaıǵa barǵanyn jazǵan bolatynbyz.