Ǵylym salasyndaǵy áıelderge páter sertıfıkaty berildi
ASTANA.KAZINFORM – QR Ǵylym jáne joǵary bilim mınıstrliginde Halyqaralyq áıelder kúni qarsańynda otandyq ǵylym salasynda eńbek etip júrgen jas zertteýshilerge memlekettik qoldaý kórsetildi. Búgin mınıstr Saıasat Nurbek merekelik is-shara barysynda Memleket basshysynyń tapsyrmasyna sáıkes 5 jas ǵalymǵa turǵyn úı sertıfıkattaryn saltanatty túrde tabystady.
Bul bastama QR Prezıdenti 2024 jylǵy 31 mamyrda Ǵylym ordasynda jas ǵalymdarmen kezdesý barysynda bergen tapsyrmasyn iske asyrý aıasynda júzege asyrylyp otyr.
Onyń negizgi maqsaty – ǵalymdardyń áleýmettik mártebesin arttyrý, ǵylym salasyndaǵy jas kadrlardy qoldaý jáne ǵylymǵa talantty jastardyń kelýin yntalandyrý. Osy baǵytta Ǵylymı uıymdar men joǵary jáne joǵary oqý ornynan keıingi bilim berý uıymdarynyń jas ǵalymdary úshin turǵyn úı bólý jónindegi komıssııa Astana jáne Almaty qalalarynda baspana berý úshin ǵylymı uıymdar men JOO jas ǵalymdarynyń tizimin júıeli túrde anyqtap keledi.
Ǵylym jáne joǵary bilim mınıstrligi málimetinshe, merekelik jıynda mınıstr áıelder qaýymyn Halyqaralyq áıelder kúnimen quttyqtap, bul mereke izettilik pen iltıpattyń, parasat pen meıirimniń nyshany ǵana emes, qoǵam ómirindegi áıeldiń aıryqsha ornyn aıqyndaıtyn kún ekenin atap ótti.
– Qazirgi tańda elimizde ǵylymı zertteýmen aınalysatyn 12 893 áıel bar. Bul – ǵylymı qyzmetkerlerdiń jalpy sanynyń 56 paıyzy. Al áıel zertteýshilerdiń jalpy zertteýshiler sanyndaǵy úlesi 55,7 paıyzy. Olar irgeli zertteýlerden bastap qoldanbaly jáne pánaralyq jobalarǵa deıingi túrli ǵylymı baǵyttarda tabysty eńbek etip keledi. Memleket ǵylym men joǵary bilim salasyndaǵy áıelderdiń bastamalaryn árdaıym qoldaıdy. Sizderdiń kásibı ósýlerińizge, ǵylymı izdenisterińizge jáne kóshbasshylyq qabiletterińizdi damytýǵa qajetti jaǵdaı jasaý – bizdiń basty mindetimizdiń biri, – dedi mınıstr.
QR Ǵylym jáne joǵary bilim mınıstrligi jas ǵalymdardy áleýmettik qoldaý baǵytyndaǵy bul jumysty kezeń-kezeńimen jalǵastyrady. Jas zertteýshiler sanynyń artýy ǵylymı jáne ǵylymı-tehnıkalyq qyzmettiń damýyna oń yqpal etedi.
Aıta keteıik, 2023 jylǵy 19 qazanda QR Ǵylym jáne joǵary bilim mınıstrligi men «Otbasy bank» AQ arasynda jas ǵalymdarǵa arnalǵan 2023-2027 jyldarǵa arnalǵan jeńildetilgen turǵyn úı nesıesin berý baǵdarlamasy boıynsha yntymaqtastyq týraly kelisimge qol qoıylǵan.
Sonymen qatar merekelik shara aıasynda ǵylym salasyna eńbegi sińgen qyzmetkerler otandyq bilim men ǵylymǵa qosqan úlesi úshin «Qurmet» jáne «Eren eńbegi úshin» ordenderimen marapattaldy.
Aıta keteıik, Memleket basshysy áıelder qaýymyn 8 naýryz merekesimen quttyqtady.