Ǵylym mınıstrligi men KAZ Minerals Astanada ǵylymı-ınnovatsııalyq Hakaton ótkizdi
ASTANA. KAZINFORM — Astanada Qazaqstannyń taý-ken ónerkásibin damytýǵa arnalǵan ǵylymı-ınnovatsııalyq Hakaton ótti. Elimizdegi ǵylymı ınstıtýttar men ýnıversıtetterden kelgen 70-ten astam ǵalymdar jáne KAZ Minerals Tobynyń ókilderi óndiris úshin mańyzdy mindettemelerdiń sheshimin tabý jáne salaǵa jańa tehnologııalardy engizý úshin bas qosty, dep habarlaıdy Kazinform agenttiginiń tilshisi.
Hakatonnyń ótkizilýine Ǵylym jáne joǵary bilim mınıstrligi men KAZ Minerals Toby bastamashy boldy. Saıasat Nurbek Hakatonnyń basty maqsaty — óndiristi jańa tehnologııalyq deńgeıge kóterip, qosymsha qun tizbegi dep atalatyn júıeni qurý ekenine toqtaldy.
— Ústimizdegi jyly biz ǵylym men tehnologııalyq saıasat týraly túbegeıli jańa zań qabyldadyq, soǵan saı ǵylymdy basqarý úlgisi de ózgeredi. Buryn ǵylymı-tehnıkalyq mindettemelerdi zertteý ınstıtýttarynan alyp kelsek, endi taqyryptar iri óndiristik kompanııalarmen birlese otyryp tujyrymdalady. Biz barlyq salalyq ınstıtýttar men ǵylymı ujymdardy óndiris oryndaryna alyp baryp, sol jerde tolyqqandy saraptama júrgizý jáne barlyq óndiris nysandaryn zertteý arqyly ǵylymı sheshimdi qajet etetin máselelerdi anyqtaımyz, — dep málimdedi Saıasat Nurbek.
KAZ Minerals Management Basqarma Tóraǵasy Eldar Mamedov Ǵylym mınıstrligi jáne ǵylymı uıymdarmen yntymaqtastyq óndiristiń barlyq kezeńderinde tehnologııalyq jetildirý jáne jumys protsesin ońtaılandyrý úshin jańa múmkindikter ashatynyn atap ótti.
— Óndiriske ǵylymı ádistemelerdi engizý tıimdilikti arttyryp, shyǵyn kólemin azaıtyp qana qoımaıdy, ol óndiris kólemin arttyryp, qaýipsizdiktiń joǵary standarttaryn saqtaýǵa septigin tıgizedi. Bizdiń Top úshin ǵylymı qaýymdastyqpen yntymaqtastyq — osy salanyń jalpy damýyna úles qosý turǵysynda mańyzdy, sebebi ǵylymı ustanym turaqty jáne ekologııalyq jaǵynan tıimdi ádisterdi qoldanýǵa múmkindik beredi, — deıdi Eldar Mamedov.
Hakaton barysynda qatysýshylar geologııalyq barlaý, ken baıytý, ekologııa, qaýipsizdik tehnıkasy jáne óndiristik protsesterdi jetildirýge baǵyttalǵan monıtorıng júıesine qatysty zertteýlerimen tanystyrdy. Jıyn sońynda KAZ Minerals Toby úshin basym TOP-5 joba iriktelip alyndy.
Ǵylymı-ınnovatsııalyq jıyn qarsańynda ǵylym jáne joǵary bilim vıtse-mınıstri Darhan Ahmed-Zakı jáne elimizdegi joǵary oqý oryndary men ǵylymı-zertteý ınstıtýttarynyń bir top ǵalymdary Bozshakóldegi óndiris kesheninde mys óndirisiniń barlyq kezeńi – karerden daıyn kontsentrat alǵanǵa deıingi jumys barysymen tanysqan bolatyn.
