Ǵylym mınıstrligi Irandaǵy qazaqstandyq stýdentterge qatysty túsinik berdi
ASTANA. KAZINFORM — Iranda akademııalyq mobıldilik baǵdarlamasy boıynsha bilim alyp jatqan qazaqstandyq stýdentter joq. Bul týraly QR Ǵylym jáne joǵary bilim vıtse-mınıstri Talǵat Eshenqulov málim etti.
Búgin Senattyń jalpy otyrysynan keıin tilshiler Iranda bilim alyp jatqan stýdetter jóninde surady.
— Qazir Iranda akademııalyq mobıldilik baǵdarlamasy boıynsha bilim alyp jatqan qazaqstandyq stýdentter joq. Al ózderi Iranǵa baryp, oqyp jatqan stýdentterdiń sanyna qatysty esep júrgizilmeıdi, — dedi T. Eshenqulov.
Budan buryn habarlanǵandaı, Iran astanasynda jáne basqa da iri qalalarynda eldiń qıyn ekonomıkalyq jaǵdaıyna baılanysty 28 jeltoqsannan beri jappaı narazylyq sharalary ótip jatyr.
Eske salsaq, taıaýda Iran bıligi syrtqy kúshterdi eldiń ishki isterine aralasý úshin ishki oqıǵalardy paıdalanýǵa tyrysty dep aıyptady.
Sonymen qatar, Eýroparlament tóraıymy Roberta Metsola dúısenbi kúni Iran Islam Respýblıkasynyń barlyq dıplomatııalyq qyzmetkeri men ókilderiniń Eýroparlamenttiń kez kelgen ǵımaraty men aýmaǵyna kirýine tyıym salý jóninde sheshim qabyldaǵanyn málimdedi.
AQSh Memlekettik departamenti Irandaǵy amerıkalyq azamattarǵa shuǵyl eskertý jasap, olardy Armenııa jáne Túrkııa shekarasy arqyly elden shyǵý múmkindigin qarastyrýǵa shaqyrdy.