Ǵylym mınıstrligi elimizdegi reıtıngi eń joǵary ýnıversıtetterdi atady
ASTANA. KAZINFORM – Ǵylym jáne joǵary bilim mınıstrligi elimizdegi reıtıngi eń joǵary ýnıversıtetterdi atady.
«2024 jylǵy 5 maýsymda QS Quacquarelli Symonds joǵary bilim salasyndaǵy halyqaralyq taldaý agenttigi álemniń úzdik ýnıversıtetteri reıtınginiń 2025 jylǵy jańa shyǵarylymyn – QS World University Rankings-2025 shyǵardy. Qazaqstan reıtıngte 21 joǵary oqý ornymen usynylǵan. Onyń beseýi jaqsaryp, tórteýi óz pozıtsııalaryn saqtap, 12-si tómendedi. Ál-Farabı atyndaǵy Qazaq ulttyq ýnıversıteti qazaqstandyq joǵary oqý oryndary arasynda kóshbasshy bolyp qala beredi jáne 163-shi orynǵa ıe bolyp, álemniń úzdik 200 joǵary oqý ornyna oraldy. Bul ótken jylǵy nátıjeden 67 pozıtsııaǵa jaqsy. Sondaı-aq, L.Gýmılev atyndaǵy EUÝ (355 orynnan 321 orynǵa) jáne Sátbaev ýnıversıtetiniń (481 orynnan 405 orynǵa) kórsetkishteri jaqsardy», - dep atap ótti mınıstrlikten agenttiktiń resmı saýalyna oraı.
Vedmostvo málimetshe, Abaı atyndaǵy QazUPÝ-da da jaqsy kórsetkish baıqalady. Qalǵan joǵary oqý oryndary byltyrǵy pozıtsııalarynda qaldy.
«Reıtıngte Qazaqstan bedeldi ındıkatorlar – akademııalyq bedel jáne jumys berýshiler arasyndaǵy bedel boıynsha kórsetkishterdiń aıtarlyqtaı jaqsarýymen atap ótildi. Ortalyq Azııanyń basqa elderimen salystyrǵanda Qazaqstan «Jumys berýshiler arasyndaǵy bedel» ındıkatory boıynsha eń jaqsy nátıjelerge qol jetkizdi. Buǵan Ortalyq Azııa óńiriniń árbir elindegi reıtıngke qatysýshy barlyq joǵary oqý oryndary úshin osy ındıkator boıynsha eseptelgen ortasha mánder dálel bola alady. Reıtıngke qatysýshy 21 qazaqstandyq JOO-nyń 19-y «akademııalyq bedel» jáne «jumys berýshiler arasyndaǵy bedel» ındıkatorlary boıynsha kórsetkishterdi jaqsartty. Ál-Farabı atyndaǵy Qazaq ulttyq ýnıversıteti men L.N. Gýmılev atyndaǵy Eýrazııa ulttyq ýnıversıteti bedeldi ındıkatorlar boıynsha eń jarqyn nátıjelerdi kórsetti. Olardyń ishinde «jumys berýshiler arasyndaǵy bedel» boıynsha QazUÝ-dyń álemdegi 77-shi orny erekshe kózge túsedi», - dedi mınıstrlikten.
