Ǵylym mınıstrligi el óńirlerine qandaı mamandar qajet ekenin kórsetetin kartalar ázirledi

ASTANA. KAZINFORM – QR Ǵylym jáne joǵary bilim mınıstrligi kadrlarǵa qajettilik boıynsha óńirlik kartalar ázirlep shyǵardy.

жасанды интеллект
Коллаж: Kazinform/Freepik

2022 jyldan beri elimizde kadr daıarlaýǵa baǵyttalǵan «Mamandyǵym – bolashaǵym» jobasy iske asyrylyp keledi. Joba Qazaqstandaǵy óńirlik eńbek naryǵynyń ózekti suranysyn eskerip, kadr daıarlaý júıesin qaıta formattaýdy kózdeıdi.

− Jobanyń negizgi mindetteri – ekonomıkalyq damýdaǵy óńirlik teńgerimsizdikti teńestirý, óńirlerdegi memleket, kásiporyndar, bilim berý uıymdary, jastar, ata-analar úshin eńbek naryǵy jáne bilim týraly aqparatqa qol jetkizý jáne óńirlik bóliniste eńbek ónimdiligi men halyqtyń tabysyn arttyrý. Osy bastamany úılestirý jáne tıimdi iske asyrý maqsatynda «Mamandyǵym – bolashaǵym» respýblıkalyq jobalyq keńsesi quryldy, - dedi «Mamandyǵym – Bolashaǵym» keńsesiniń basshysy Oljas Sákenov Ortalyq kommýnıkatsııalar qyzmetinde ótken brıfıngte.

Spıkerdiń aıtýynsha, elimizdiń 91 JOO-synda jańa kásipterdiń salalyq atlastary men óńirlik kartalar negizinde 902 bilim berý baǵdarlamasy ázirlendi. Kolledjderde 45 bilim berý baǵdarlamasy aprobatsııadan ótip jatyr.

− 9 óńirde – Pavlodar, Mańǵystaý, Qaraǵandy, Almaty, Aqtóbe, Jetisý, Aqmola, Jambyl oblystary men Astana, Almaty qalalarynda kadrlarǵa qajettilik boıynsha óńirlik kartalar ázirlendi. Óńirlik kartalardy ázirleý qorytyndysy boıynsha 473 mamandyq anyqtaldy. Edunavigator.kz platformasynda 100 myńǵa jýyq oqýshy kásibı dıagnostıkadan ótti, − dedi O.Sákenov.

Máselen, Pavlodar oblysynda 9 sala, 40 perspektıvaly mamandyq, Mańǵystaýda 3 sala, 39 perspektıvaly mamandyq, Qaraǵandy oblysynda 5 sala, 58 perspektıvaly mamandyq anyqtalǵan.

Astanada 4 sala, 17 perspektıvaly TjKB kásipteri; Almaty qalasynda 6 sala, 114 perspektıvaly kásip bar.

Aqtóbe oblysynda 43, Jetisý oblysynda 66, Aqmola oblysynda 36, Jambyl oblysynda 68 perspektıvaly mamandyq bar.

Bıyl 5 óńirde josparly nysanaly qarjylandyrý arqyly, 6 óńirde – jergilikti bıýdjet esebinen «Qazaqstan óńirleriniń jańa kásipteri men quzyretteriniń atlastary» ázirlenip jatyr.

Buǵan deıin jasandy ıntellekt áserinen qandaı mamandyqtar joıylyp ketýi múmkin ekenin jazǵan bolatynbyz.

Sondaı-aq, Prezıdent tapsyrmasyna sáıkes jáne Jumysshy mamandyqtary jyly aıasynda elimizdiń orta bilim berý uıymdarynda pedagog-kásiptik baǵdar berýshi laýazymy resmı túrde bekitildi.

Сейчас читают