Ǵylym mınıstri «Altyn Orda» jóninde: jastar Esenberlınniń shyǵarmalaryn oqyǵany jón
ASTANA. KAZINFORM – Oqý-aǵartý jáne Ǵylym mınıstrleri oqýshylar men jastarǵa jaqyn arada oqyp shyǵýǵa bolatyn mańyzdy týyndylardyń tizimin jasady.
QR Ǵylym jáne joǵary bilim mınıstri Saıasat Nurbek oqýshylar men jastarǵa Іlııas Esenberlınniń kitaptaryn oqýǵa keńes berdi.
- Birinshi kezekte «Altyn Orda» tarıhı trılogııasyn oqyp shyqqan jón. Jaqynda elimizde «Altyn Orda — dala órkenıetiniń modeli: tarıh, arheologııa, mádenıet, biregeılik» atty halyqaralyq sımpozıýmdy ótkizdik. 23 elden osy taqyrypty zerttep júrgen 350 mamandy shaqyrdyq. Jalpy, qazir osy alyp ımperııany zertteýge kirisken ǵalymdar kóp, ıaǵnı batys elderi men Ońtústik-Shyǵys Azııada baıqalyp otyr. Sondyqtan Іlııas Esenberlınniń eńbekterinde sol kezeńdegi oqıǵalar óte jaqsy ári qyzyqty jazylǵan. Bul kitaptardy bala kezimde oqyǵan edim jáne ondaǵy qundy derekterdi jetkilikti deńgeıde túsinbeppin. Jaqynda «Altyn Ordany» qaıtadan oqyp shyqtym, - dedi S. Nurbek Úkimet otyrysynan keıingi baspasóz máslıhatynda.
Sonymen qatar Ǵylym mınıstri sheteldik jazýshylardyń arasynan Genrı Kıssındjer men Erık Shmıdtiń jasandy ıntellekt taqyrybyndaǵy kitabyn oqýǵa bolatynyn aıtty.
Óz kezeginde Oqý-aǵartý mınıstri Juldyz Súleımenova qazir Qazaqstannyń memleket jáne qoǵam qaıratkeri, kórnekti jazýshy ári oıshyl Ábish Kekilbaıulynyń shyǵarmashylyǵyn qaıta oqyp jatqanyn jetkizdi.
- Munymen qosa, Djonatan Haıdtyń «Mazasyz urpaq» kitabyn oqydym. Bul týyndada áleýmettik jelide otyratyn oqýshylar men jasóspirimderdiń psıhologııasy zerttelgen, - dedi mınıstr.
Budan bólek Oqý-aǵartý mınıstri Kaı-Fý Lıdiń jasandy ıntellekt taqyrybyndaǵy kitabyn oqýǵa kiriskenin atap ótti.
Eske salsaq, jaqynda Memleket basshysy «Qazaqstan Respýblıkasynyń orta bilim berý júıesine jasandy ıntellektini endirý jónindegi sharalar týraly» Jarlyqqa qol qoıdy.
