Ǵylym men tehnologııa toǵysy: otandyq drondar óndirisi jolǵa qoıylmaq
ASTANA. KAZINFORM — «Qazaqstan ınjınırıng» R& D ortalyǵy 2020 jyldan beri ártúrli maqsattaǵy ushý apparattaryn ázirleýmen aınalysyp keledi. Atalǵan tehnologııalar áýe, sý, sýasty jáne jer ústi keńistikterinde barlaý jáne baqylaý jumystaryn júrgizýge, aýyl sharýashylyǵy men áskerı salada qoldanýǵa arnalǵan. Bul týraly vedomstvonyń baspasóz qyzmeti málim etti.
— Joba QR ǵylymı jáne (nemese) ǵylymı-tehnıkalyq qyzmet nátıjelerin kommertsııalandyrý baǵdarlamasy aıasynda júzege asyrylyp, «Ártúrli ekonomıkalyq salalardyń qajettilikteri úshin otandyq ázirlemedegi ushqyshsyz avıatsııalyq keshenderdi (UAK) óndirý» taqyrybyn qamtıdy, — delingen habarlamada.
Ortalyqtyń qyzmeti qorǵanys-ónerkásip keshenindegi otandyq ǵylymdy damytýǵa, memlekettiń áskerı qaýipsizdigin qamtamasyz etý maqsatynda áskerı jáne qos maqsattaǵy ónimderdi jańǵyrtý men jańa túrlerin ázirleýdi ǵylymı-tehnıkalyq turǵyda qoldaýǵa baǵyttalǵan.
Sonymen qatar ortalyq ınnovatsııalyq ıdeıalardy ónerkásiptik serııalyq óndiriske jetkizý maqsatynda jańalyq tabýshylarǵa qyzmetterdiń tolyq spektrin usynyp, jobalardy keshendi qoldaý jáne súıemeldeýdi júzege asyrady.
— Búginde ortalyq áýe robototehnıkasy baǵytynda memlekettik sektor, qoǵamdyq qaýipsizdik jáne óndiristik kásiporyndar úshin birqatar zamanaýı sheshimder ázirlegen. Olardyń qatarynda nysanalardy anyqtaý men zaqymdaýǵa arnalǵan «Jebe» tosqaýyldaý oq-dárisi, oqý-jattyǵý maqsatyndaǵy ushqyshsyz áýe nysanalary, teńiz operatsııalaryna arnalǵan ekıpajsyz keme, mobıldi robottehnıkalyq keshender, sondaı-aq monıtorıng, barlaý jáne arnaıy tapsyrmalardy oryndaýǵa arnalǵan «Qaraqus», «MASA», «Saryarqa», «JETISÝ», «SAMŪRYQ» jáne «Shaǵala-M» sııaqty ushqyshsyz júıeler bar, — jazdy vedomstvodan.
Atalǵan ázirlemeler otandyq ǵylymnyń qorǵanys jáne joǵary tehnologııalar salasyndaǵy áleýetin arttyryp, elimizdiń tehnologııalyq táýelsizdigin nyǵaıtýǵa eleýli úles qosady.
Eske sala keteıik, buǵan deıin Ǵylym jáne joǵary bilim mınıstri Saıasat Nurbek ǵylym salasyndaǵy jobalardy irikteý men qarjylandyrý tetikteri jetildirilip, birqatar rásimdik ózgerister engiziletinin málimdegen edi.
