Ǵylym men óndiris sınergııasy: karbamıd óndirisi zertteledi
ASTANA. KAZINFORM — Іri otandyq kompanııalar tehnologııalyq damýdy tereńdetip, ishki jáne syrtqy naryqtarda básekege qabiletti sheshimder jasaý maqsatynda ǵylymı uıymdarmen belsendi túrde yntymaqtasyp keledi. Osy baǵytta birneshe joba júzege aspaq. Bul týraly Úkimettiń baspasóz qyzmeti málim etti.
— KMG PetroChem kompanııasy men QR Prezıdenti janyndaǵy Ulttyq ǵylym akademııasy agroónerkásiptik keshende otandyq karbamıdti qoldaný jónindegi yntymaqtastyq týraly kelisimge qol qoıdy. Qujat bolashaq karbamıd óndirisin ǵylymı turǵydan rastaý jáne onyń tıimdiligin jan-jaqty baǵalaýǵa baǵyttalǵan, — delingen habarlamada.
Kelisim aıasynda Ǵylym akademııasy topyraq pen ósimdikterge zerthanalyq jáne dala synamalaryn júrgizip, ǵylymı esepter men praktıkalyq usynymdar ázirleıdi. 2025 jyly elimizdiń ártúrli agroklımattyq aımaqtarynda synaqtar bastalyp, shamamen 600 gektar egis alqaby qamtyldy.
Nátıjeleri ónimdilikti arttyrýǵa, eksporttyq áleýetti nyǵaıtýǵa jáne sharýalardy otandyq óndiristiń tıimdi tyńaıtqyshymen qamtamasyz etýge múmkindik beredi.
Osylaısha, Úkimet óndiristi joǵary deńgeıde óńdeý, ónerkásiptiń básekege qabilettiligin arttyrý jáne jańa jumys oryndaryn qurý baǵytynda jumystar júrgizip keledi.
Eske sala keteıik, Qazaqstan men Qytaı karbamıd zaýytyn birlesip salady.