Ǵylym men ınnovatsııa dıalogi: Sıanda 7-shi Jibek joly forýmy bastaldy
SIANЬ. KAZINFORM — Shensı provıntsııasynda «Jibek jolynyń jańa baǵyttary: kemeldengen jastar, jańa dáýirge bet burý» taqyrybynda «Jas ǵalymdardyń 7-shi Jibek joly Forýmy» jumysyn bastady. Іs-sharany Shensı provıntsııasynyń Halyq úkimeti men Soltústik-Batys ýnıversıteti uıymdastyrdy. Bul týraly SІM málim etti.
Forýmnyń basty maqsaty — «Jibek joly rýhyn» jáne «Ortalyq Azııa– Qytaı múmkindigin» dáripteý. Sondaı-aq, Ortalyq Azııa elderimen bilim, týrızm, mádenıet, arheologııa, medıa sııaqty salalardaǵy ózara tájirıbe almasý men uzaq merzimdi yntymaqtastyqty odan ári nyǵaıtýǵa baǵyttalǵan.
Forýmnyń úsh kúndik jumysyna 20 elden sala mamandary, onyń ishinde ShYU memleketterinen «Bir beldeý, bir jol» bastamasyna qatysýshy elderden, sondaı-aq Ortalyq, Ońtústik jáne Batys Azııa memleketteriniń joǵary oqý oryndary men ǵylymı-zertteý mekemeleriniń ǵalymdary, týrıstik birlestikter, jetekshi kompanııalar men BAQ ókilderi qatysyp jatyr.
Forýmnyń ashylý saltanatyna Shensı provıntsııasy Partııa komıtetiniń Hatshysy Chjao Ide qatysyp, forýmǵa qatysýshy jas mamandar men ǵalymdardy, óndiris mamandaryn, ónertapqyshtar men zertteý ınstıtýttary qyzmetkerlerin quttyqtady.
— Qytaı Halyq Respýblıkasy Kommýnıstik Partııasynyń 20-shy seziniń tórtinshi plenýmy sheńberinde bilim, ǵylym-tehnologııaǵa beıim talanttardy toptasqan ortalyqtaryn josparly túrde damytýdy, álemdik áleýetke ıe bilim-ǵylym ortalyqtarymen seriktestik ornatýdy, oıtapqysh talantty jastarǵa qarjylaı grand bólý, sheteldik mamandarǵa 5 jyldan joǵary merzimge «turaqty turý kartasyn» berýsekildi birqatar jańa sheshimder qabyldaǵan. Qytaı memleketi zamanýı tehnologııalyq básekege tótep berý jolynda óziniń ishki resýrstarymen qosa, syrtqy oıshyl mamandardy da ár túrli tásildermen ózine tartyp, jańa ǵylymı jańalyqtardyń órisin keńeıtýge kúsh salatyndyǵyn aıqyn baıqatty, — delingen habarlamada.
Forým alańynda Qazaqstan Respýblıkasynyń Sıandaǵy Bas konsýly Joshyhan Qyraýbaev qurmetti qonaq retinde qatysyp, sóz sóıledi. Óziniń baıandamasynda ol 2025 jylǵy qyrkúıektegi Qazaqstan Prezıdenti Qasym-Jomart Toqaevtyń «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty halyqqa Joldaýynda aıtylǵan jastar bilimin zamanaýı negizde jetildirý, jasandy ıntelekt pen ekonomıkalyq damýdy ushtastyrý sekildi baǵdardyń mazmunymen qysqasha tanystyryp ótti. Bas konsýl Qazaqstandaǵy áleýmettik-ekonomıkalyq damýdy qamtamasyz etý baǵytynda júrgizilip jatqan basty reformalar men basymdyqtar týraly málimet berdi.
Qazaqstan men Qytaı arasyndaǵy zamanaýı ǵylym men bilim berý seriktestigi eki memleket basshylarynyń úılesimdi strategııalyq baǵytyna — Qazaqstan Respýblıkasynyń Prezıdenti Qasym-Jomart Toqaevtyń ıntellektýaldy ult qalyptastyrý jáne akademııalyq kóshbasshylyqtyń jańa ortalyqtaryn damytý jónindegi strategııalyq kýrsy men Qytaı Halyq Respýblıkasynyń Tóraǵasy Sı Tszınpın usynǵan «Bir beldeý — bir jol» bastamasyna negizdelgenin aıtty.
Memleket basshysy Qasym-Jomart Toqaevtyń 2025 jyldy «Jumysshy mamandyqtar jyly» dep jarııalaýyna balanysty, memleketimizdiń ekonomıkalyq damýyna qajetti jas mamandar daıarlaýǵa qazaqstandyq tarapynan asa kóńil bóletindigin aıtty. Osy baǵytta Bas konsýldyq tehnıkalyq kolledjder men ýnıversıtetter arasynda konsýldyq okrýgke kiretin provıntsııalardyń oqý oryndarymen oqýshylar men maman almasý jumystaryn udaıy uıymdastyryp otyratyndyǵyn jetkizdi.
Ashylý rásiminen keıin qonaqtar óner tapqyshtar kórmesin aralap, jasandy ıntelekt, telekommýnıkatsııa jáne áýe keńistigin ıgerý, qurylys materıaldaryn shyǵarý, qorshaǵan ortany qorǵaý men shól zonalaryn ıgerý, kókónis daqyldarynyń jańa sorttaryn selektsııa jolymen shyǵarýshy ǵylymı ortalyq mamandarymen kezdesti. Bas konsýl kórmege qatysýshylardy Qazaqstannyń otandyq zerthanalarymen ortaq jobalarda birlese jumys jasaýǵa shaqyrdy.
Eske sala keteıik, buǵan deıin 2026 jyly Qytaı ýnıversıtetterin 12,7 mln stýdent támamdaıtynyn jazdyq.