Ǵylym men bıznes seriktestigi: Jobalardan satýdan 65,3 mlrd teńge tústi
ASTANA. KAZINFORM – Ǵylym men bıznestiń seriktestigi nátıjesinde júzege asqan jobalardy satýdan 65,3 mlrd teńge qarjy tústi. Bul týraly Ǵylym jáne joǵary bilim mınıstrliginen málim etti.
- «Ǵylym qory» AQ qoldaý kórsetetin jobalardy kommertsııalandyrýdyń negizgi ereksheligi men mindetti sharty – ǵylym men bıznestiń seriktestigi, sondaı-aq jeke ınvestorlar tarapynan mindetti túrde qosa qarjylandyrýdyń bolýy. Qoldaý tapqan jobalardyń elimizdiń ǵylymı-tehnıkalyq damýyna qosqan jıyntyq úlesi 147,2 mlrd teńgeni (satý kólemin, tartylǵan qosa qarjylandyrýdy, salyq aýdarymdaryn jáne negizgi quraldardy satyp alýdy qosa alǵanda) quraıdy, - delingen mınıstrliktiń agenttik saýalyna bergen jaýabynda.
Vedomstvo málimetinshe, salyq túsimderi túrinde bıýdjetke 13,5 mlrd teńge tólendi. Tartylǵan jeke qarjylandyrý kólemi shamamen 28,2 mlrd teńge boldy.
- Jobalardy iske asyrý aıasynda 2,4 myńǵa jýyq jumys orny quryldy. Satýdan túsken tabys 65,3 mlrd teńgege jetti. Onyń ishinde eksporttalǵan ónim kólemi 1,6 mlrd teńgeni qurady. 40,1 mlrd teńge somasyna negizgi quraldar satyp alyndy. Bıznes ókilderi tek qarjylyq qarajatpen ǵana qatysyp qoımaı, ǵylymı ázirlemelerdi naryqqa shyǵarý úshin ózderiniń óndiristik bazalaryn, zerthanalary men dıstrıbıýtorlyq jelilerin de usynady, - dep naqtylaıdy Ǵylym mınıstrligi.
Buǵan deıin qazaq ǵalymdarynyń ázirlemeleri shetelderde suranysqa ıe bolǵanyn jazǵan edik.
