Ǵylym kúni: 10 jas ǵalym Prezıdenttiń qolynan páter kiltin aldy
ASTANA. KAZINFORM — Búgin Memleket basshysy Qasym-Jomart Toqaev Ǵylym qyzmetkerleri kúnine oraı birqatar ǵylymı qaýymdastyq ókilderin marapattap, 10 jas ǵalymǵa páter kiltterin tabystady.
Saltanatty jıynda Prezıdent otandyq ǵylymdy jan-jaqty qoldaýdyń jáne eldiń ǵylymı áleýetin damytý úshin qolaıly jaǵdaı qalyptastyrýdyń mańyzdylyǵyn atap ótti. Turǵyn úı alǵandardyń qatarynda irgeli jáne qoldanbaly zertteýlerdi damytýǵa eleýli úles qosyp júrgen ǵylymı uıymdar men joǵary jáne joǵary oqý ornynan keıingi bilim berý uıymdarynyń ókilderi bar.
Qasym-Jomart Toqaev ǵylymı áleýet memlekettiń básekege qabilettiligi men halyqaralyq arenadaǵy bedeliniń negizgi kórsetkishteriniń biri ekenin atap ótti. Sonymen qatar bıyl Tsıfrlandyrý jáne jasandy ıntellekt jyly dep jarııalanǵanyn eske salyp, bul Qazaqstandaǵy ǵylymı damýdyń basymdyǵyn aıqyndaıtynyn jetkizdi. Prezıdenttiń aıtýynsha, ǵylymǵa arqa súıeý strategııalyq mindetke aınalyp otyr. Osyǵan baılanysty ony qarjylandyrý kólemi alty esege artty, ǵylymı-zertteý ýnıversıtetteriniń jelisi keńeıýde, sondaı-aq ǵylymı jobalarǵa ınvestıtsııa salatyn bızneske salyqtyq jeńildikter qarastyrylǵan.
Іs-shara barysynda jastardyń róline de erekshe nazar aýdaryldy. Memleket basshysy otandyq ǵylymnyń bolashaǵy bilimdi, daryndy jáne maqsatqa umtylǵan jas mamandardyń qolynda ekenin atap ótti.
Ǵylym qyzmetkerleri kúni qarsańynda Prezıdent 2026 jylǵy 10 sáýirdegi Qazaqstan Respýblıkasynyń memlekettik nagradalarymen marapattaý týraly Jarlyqqa qol qoıdy. Ǵylym salasyndaǵy eleýli jetistikteri men joǵary bilimdi damytýǵa qosqan úlesi úshin ǵylymı qaýymdastyq ókilderi «Parasat» jáne «Qurmet» ordenderimen, «Eren eńbegi úshin» medalimen, sondaı-aq «Qazaqstannyń eńbek sińirgen qaıratkeri» jáne «Qazaqstannyń eńbek sińirgen ǵylym jáne tehnıka qaıratkeri» qurmetti ataqtarymen marapattaldy.
Saltanatty rásim barysynda Memleket basshysy jas zertteýshilerge 10 páterdiń kiltin jeke tabystap, otandyq ǵylymdy qoldaýdyń mańyzdylyǵyn, sondaı-aq eldiń ǵylymı áleýetin ashý men damytý úshin qolaıly jaǵdaı qalyptastyrý qajettigin atap ótti.
— Memleket basshysynyń tapsyrmalaryn iske asyrý aıasynda Ǵylym jáne joǵary bilim mınıstrligi jas ǵalymdardy turǵyn úımen qamtamasyz etý boıynsha júıeli jumys júrgizip jatyr. Bul — áleýmettik qoldaýdyń jáne ǵylymı qyzmetti yntalandyrýdyń mańyzdy tetikteriniń biri. Salalyq komıssııa jumysynyń qorytyndysy boıynsha ǵylymı uıymdar men joǵary jáne joǵary oqý ornynan keıingi bilim berý uıymdarynyń ókilderine páterler bólindi. 2024-2026 jyldary Prezıdent tapsyrmasy aıasynda Almaty jáne Astana qalalarynda 132 páter óteýsiz negizde berildi. Al 2023-2026 jyldary vedomstvo jumysynyń nátıjesinde 656 jas ǵalymǵa páter kiltteri tabystaldy, — delingen habarlamada.
Atalǵan sharalar ǵalymdardyń áleýmettik mártebesin arttyrýǵa, jas mamandardy ǵylym salasyna tartýǵa jáne Qazaqstan ǵylymynyń kadrlyq áleýetin nyǵaıtýǵa baǵyttalǵan.
Budan buryn Prezıdent ǵylym salasynda zor jetistikke jetken ǵalymdardy marapattaǵanyn jazǵanbyz.