Ǵylym, ınnovatsııa jáne jasandy ıntellekt: Qazaqstan Eýropamen yntymaqtastyqty keńeıtedi
ASTANA.KAZINFORM — Kelissózderdiń negizgi taqyryby Qazaqstan men Eýropalyq odaq arasyndaǵy ǵylym, ǵylymı zertteýler, ınnovatsııalar jáne tehnologııalyq kásipkerlik salalaryndaǵy yntymaqtastyqty nyǵaıtý boldy.
QR Prezıdenti Qasym-Jomart Toqaevtyń Belgııa Koroldigine resmı sapary aıasynda QR Ǵylym jáne joǵary bilim mınıstri Saıasat Nurbek Eýropalyq komıssııanyń Zertteýler jáne ınnovatsııalar jónindegi bas dırektsııasy bas dırektorynyń orynbasary Marııa Krıstına Rýsso jáne Eýropalyq ınnovatsııalar keńesiniń tóraǵasy Mıhıl Sheffermen kezdesti.
Kelissózderdiń negizgi taqyryby Qazaqstan men Eýropalyq odaq arasyndaǵy ǵylym, ǵylymı zertteýler, ınnovatsııalar jáne tehnologııalyq kásipkerlik salalaryndaǵy yntymaqtastyqty nyǵaıtý boldy.
Kezdesýler barysynda Qazaqstannyń Horizon Europe baǵdarlamasyna qaýymdasý úderisin ilgeriletý máselesine erekshe nazar aýdaryldy.
Qazaqstan bul qaýymdastyqty otandyq joǵary oqý oryndarynyń, ǵylymı uıymdar men kompanııalardyń eýropalyq zertteý konsortsıýmdaryna, birlesken jobalarǵa jáne Eýropalyq zertteý keńistigine qatysý múmkindikterin keńeıtetin strategııalyq qadam retinde qarastyrady.
— Sondaı-aq taraptar deep-tech baǵyttaryn damytý, ǵylymı ázirlemelerdi kommertsııalandyrý, startaptardy qoldaý, ǵylym men ónerkásipte jasandy ıntellektini qoldaný, sondaı-aq eýropalyq seriktestermen birlesken bastamalardy ázirleý perspektıvalaryn talqylady, — delingen mınıstrlik habarlamasynda.
Atalǵan kezdesýler Qazaqstannyń Horizon Europe baǵdarlamasyna qaýymdasý bastamasyn ilgeriletýdegi jáne Eýropalyq odaqpen ınnovatsııalyq yntymaqtastyqty keńeıtýdegi mańyzdy kezeń boldy.
— Qazaqstan jekelegen ǵylymı jobalarǵa qatysýmen ǵana shektelmeı, otandyq ýnıversıtetterdiń, ǵylymı-zertteý uıymdarynyń, startaptar men tehnologııalyq kompanııalardyń eýropalyq zertteýler, ınnovatsııalar jáne deep-tech jelilerine tolyqqandy kirigýin maqsat etedi. Bul baǵyttaǵy jumysta Eýropalyq komıssııamen jáne Eýropalyq ınnovatsııalar keńesimen praktıkalyq yntymaqtastyqty damytý erekshe mańyzǵa ıe bolady, — delingen habarlamada.
Aıta ketelik elde jasandy ıntellekt boıynsha halyqaralyq aına zerthanasy qurylatyny týraly jazǵan edik.
