Ǵylym álemindegi jetistikter barsha eldiń áleýetin arttyra túsýi kerek – Memleket basshysy
ASTANA. KAZINFORM – Memleket basshysy Qasym-Jomart Toqaev búgin «Qazaqstan – akademııalyq bilim aımaǵy» halyqaralyq strategııalyq seriktester forýmy barysynda ǵylymnyń eń basty mıssııasy – adamzat ıgiligine qyzmet etý ekenin aıtty.
Osy oraıda Memleket basshysy Qazaqstan óz ýnıversıtetterin aldaǵy ýaqytta da jan-jaqty damytatynyn jetkizdi.
– Myqty ýnıversıtetter – keleshektiń fabrıkasy. Bul jerde ıdeıalar týyp, kedergiler eńseriledi. Ádil ári úılesimdi álemniń alǵysharttary qalyptasady. Joǵary oqý oryndary halyqtar arasyndaǵy senim men yntymaqty kúsheıtip, dıplomatııa qundylyqtaryn dáripteıdi. Ýnıversıtet qabyrǵasynda qalyptasatyn stýdentter baýyrlastyǵy, zertteýshiler qoǵamdastyǵy jáne akademııalyq seriktestik tek ǵylym-bilim salasynda emes, ekonomıka men qoǵamdyq ómirdegi, tipti saıasattaǵy ózgeristerge qozǵaý salady. Ultymyzdyń birtýar perzenti, áıgili akademık Qanysh Sátbaevtyń «Ǵalym barlyq ómirin halyq úshin, adamzat úshin sarp etedi» degen sózi bar. Shyn máninde, ǵylymnyń eń basty mıssııasy – adamzat ıgiligine qyzmet etý. Ǵylym álemindegi jetistikter barsha eldiń áleýetin arttyra túsýi kerek dep sanaımyn. Sebebi ǵylym-bilim – bólisken saıyn molaıa túsetin ári sheksiz múmkindikterge jol ashatyn qýatty qural. Bul saladaǵy yqpaldastyq Qazaqstandaǵy bilim-ǵylym júıesiniń órisin keńeıtip, akademııalyq dıplomatııany órkendetýge zor yqpal etedi dep senemin, – dedi Memleket basshysy.
Prezıdent elimizde daryndy, qabiletti, oıy ushqyr azamattar óte kóp ekenine toqtalyp, halqymyzdyń jasampazdyq rýhyna senetinin jetkizdi.
– Bárimiz bir el bolyp qolǵa alǵan reformalar – jurtymyzdyń jarqyn bolashaǵyna aparatyn dańǵyl jol. Sondyqtan biz aldaǵy ýaqytta da bilim men ǵylymǵa arqa súıep, Ádiletti, Taza, Qaýipsiz jáne Kúshti Qazaqstandy qurý isin jalǵastyra beremiz. Osy mańyzdy mıssııany oryndaýǵa strategııalyq seriktesterimiz, bilim jáne ǵylym ordalary erekshe úles qosyp jatqanyn atap ótkim keledi. Sebebi Sizder elimizdiń basty baılyǵy –azamattarymyzdyń ǵylymı kókjıegin keńeıtýge, olardyń áleýetin arttyrýǵa is júzinde atsalysyp jatsyzdar, – dedi Qasym-Jomart Toqaev.
Jıynda QR Joǵary bilim jáne ǵylym mınıstri Saıasat Nurbek, Quacquarelli Symonds (QS) kompanııasynyń prezıdenti Nýntsıo Kvakvarellı, Máskeý memlekettik halyqaralyq qatynastar ınstıtýtynyń (MGIMO) rektory Anatolıı Torkýnov, Beıjiń Til jáne mádenıet ýnıversıtetiniń prezıdenti Pen Dýan, Cardiff University prezıdenti Vendı Larner, Woosong bilim berý qory qamqorshylyq keńesiniń tóraǵasy Kım Song Keng, Máskeý ulttyq ıadrolyq zertteý ýnıversıtetiniń rektory Vladımır Shevchenko, Minerva University prezıdenti Ben Nelson, Baký memlekettik ýnıversıtetiniń rektory Elchın Babaev, M.Qozybaev atyndaǵy Soltústik Qazaqstan ýnıversıtetiniń rektory Erbol Isaqaev sóz sóıledi.
Osyǵan deıin Memleket basshysy Qazaqstan jahandyq bilim naryǵynyń bir bóligine aınalýdy kózdep otyrǵanyna toqtalǵan edi.