«Ǵylym álemin ashamyz» ǵaryshtyq zertteýler boıynsha halyqaralyq konkýrs qorytyndylandy

Saıysty qorytyndylaý saltanatyna Oqý-aǵartý mınıstri Juldyz Súleımenova qatysty. Jeńimpazdar men júldegerlerdi marapattaý rásimi elordadaǵy № 115 jalpy orta bilim beretin «Keleshek» mektebinde ótti.

— Qazaqstan Respýblıkasynda ǵylymdy damytýǵa jyl saıyn erekshe kóńil bólinip keledi. Jas ǵalymdardy qoldaý júıeli túrde júzege asyrylýda. Memleket basshysy ǵalymdardyń eńbekterin joǵary baǵalaıdy, kúni keshe birqatar jas zertteýshilerge páter kiltteri tabystaldy. Bul- elimizde ǵylym men bilimniń damýyna naqty ári turaqty qoldaý kórsetilip otyrǵanynyń aıqyn kórinisi. Barshańyzǵa belgili, biz Qazaqstan Respýblıkasynyń jańa Konstıtýtsııasyn qabyldadyq. Atalǵan qujatta memleket damýynyń strategııalyq basymdyǵy retinde adam kapıtaly, ǵylym jáne bilim aıqyndaldy. Bul-sizderge, jas zertteýshilerge artylǵan zor senimniń belgisi. Osy jolda sizderdiń eńbekterińiz ben izdenisterińiz el bolashaǵynyń berik negizine aınalary sózsiz. Memleket basshysy sizderge úlken úmit artady, — dedi Juldyz Súleımenova.

Konkýrsqa elimizdiń barlyq óńirinen, sondaı-aq Qytaı Halyq Respýblıkasy men Túrkııadan 200-ge jýyq oqýshy men 20 ǵylymı jetekshi qatysty. Saıystyń negizgi maqsaty- daryndy oqýshylardy anyqtaý, damytý jáne qoldaý, jasóspirimder arasynda ǵylymı-zertteý qyzmetine qyzyǵýshylyqty arttyrý, ǵarysh salasyndaǵy otandyq jáne álemdik jetistikterdi nasıhattaý, sondaı-aq halyqaralyq ǵylymı yntymaqtastyqty nyǵaıtý.

Úsh baǵyt boıynsha ótken baıqaýdyń qorytyndysy boıynsha jeńimpazdar men júldegerler Qazaqstan Respýblıkasy Oqý-aǵartý mınıstrliginiń I, II jáne III dárejeli dıplomdarymen, sondaı-aq altyn, kúmis jáne qola medaldarmen marapattaldy. Atap aıtqanda, 22 oqýshy І oryn, 35 oqýshy ІІ oryn, 58 oqýshy ІІІ oryn ıegeri atandy.

Aıta ketelik elordalyq oqýshy oqý úderisin jetildiretin joba oılap tapqan edi.