GII 2026: Qazaqstan sońǵy 10 jyldaǵy úzdik nátıjege jetti
ASTANA. KAZINFORM – Óńirlik kórsetkish boıynsha Qazaqstan Ortalyq Azııa elderi arasynda 1-orynǵa, al Ortalyq jáne Ońtústik Azııanyń 11 ekonomıkasy arasynda 2-orynǵa ıe boldy.
Qazaqstan Dúnıejúzilik zııatkerlik menshik uıymynyń (DZMU) 2026 jylǵy Jahandyq ınnovatsııalyq ındeksinde (Global Innovation Index, GII) eleýli ilgerileý kórsetip, birden 8 satyǵa kóterildi jáne álemniń 139 ekonomıkasy arasynda 81-orynnan 73-orynǵa shyqty. Bul – Qazaqstannyń sońǵy 10 jyldaǵy eń úzdik nátıjesi.
Óńirlik kórsetkish boıynsha Qazaqstan Ortalyq Azııa elderi arasynda 1-orynǵa, al Ortalyq jáne Ońtústik Azııanyń 11 ekonomıkasy arasynda 2-orynǵa ıe boldy. Tabys deńgeıi ortashadan joǵary 35 eldiń ishinde Qazaqstan 17-orynǵa ornalasty. Eń eleýli ilgerileý ınnovatsııalyq nátıjeler boıynsha tirkeldi. Innovatsııalyq nátıjeler sýbındeksi (Innovation Outputs) boıynsha Qazaqstan birden 11 satyǵa kóterilip, 84-orynnan 73-orynǵa shyqty, al ınnovatsııalyq resýrstar sýbındeksi (Innovation Inputs) boıynsha 75-orynnan 73-orynǵa jaqsardy.
GII 2026 nátıjeleri Jenevadaǵy DZMU shtab-páterinde múshe memleketterdiń turaqty ókilderine arnalǵan Indekstiń aldyn ala tanystyrylymy aıasynda usynyldy.
Qazaqstannyń reıtıngtegi pozıtsııasynyń jaqsarýyna ulttyq jáne halyqaralyq deńgeılerde júrgizilgen júıeli jumys negiz boldy. 2026 jyl ishinde Qazaqstan Respýblıkasynyń Jenevadaǵy Turaqty ókildigi GII máseleleri boıynsha DZMU-men tikeleı ózara is-qımyl ornatyp, naqty ındıkatorlarǵa, olardy esepteý ádistemesine jáne derekterdiń sapasyna basymdyq berdi.
Turaqty ókildiktiń bastamasymen DZMU sarapshylary men Qazaqstannyń memlekettik organdarynyń qatysýymen jeke onlaın-konsýltatsııa uıymdastyryldy. Onyń barysynda el kórsetkishteri, derekkózder, jetispeıtin jáne eskirgen statıstıkalyq málimetter, sondaı-aq odan ári jumys isteý baǵyttary egjeı-tegjeıli qaraldy. Konsýltatsııalar qorytyndysy boıynsha Turaqty ókildik GII jóninde naqty usynymdary bar taldamalyq materıal ázirlep, ony Qazaqstannyń múddeli memlekettik organdaryna joldady. Halyqaralyq statıstıkanyń sapasyna jáne Qazaqstan boıynsha derekterdiń ýaqtyly ári durys kórsetilýine erekshe nazar aýdaryldy.
Atqarylǵan jumys Qazaqstan men DZMU arasyndaǵy ózara is-qımyldy reıtıngti jyl saıynǵy monıtorıngteýden naqty kórsetkishter, derekkózder jáne memlekettik saıasattyń qajetti sharalary boıynsha mazmundy jumys formatyna kóshirýge múmkindik berdi.
Qol jetkizilgen ilgerileýge qaramastan, ǵylymı-zertteý jáne tájirıbelik-konstrýktorlyq jumystarǵa jumsalatyn shyǵystar, ýnıversıtetter men bıznestiń ózara is-qımyly, venchýrlik qarjylandyrý, ınnovatsııalyq klasterlerdi damytý, baǵdarlamalyq qamtamasyz etý, sondaı-aq ǵylymı-tehnıkalyq jarııalanymdar baǵyttarynda odan ári ósý áleýeti saqtalyp otyr.
Aıta ketelik elimizde jasandy ıntellekt pen startapty damytý boıynsha halyqaralyq ınnovatsııalyq hab qurylady.
