Gıdter tapshy: SQO-da týrısterge sapaly qyzmet kórsetý úshin oqytý kýrsy bastaldy
PETROPAVL. KAZINFORM – Soltústik Qazaqstan oblysynda týrıstik salada bilikti mamandar tapshylyǵyn azaıtý maqsatynda gıdter men ekskýrsovodtarǵa arnalǵan on kúndik oqý kýrsy ótip jatyr.
Uıymdastyrýshylardyń aıtýynsha, bastapqyda on adamdy kýrsqa qabyldaý josparlansa, qazir oqýǵa tilek bildirýshiler sany 25-ke jýyqtaǵan. Olardyń arasynda pedagogter, stýdentter, jýrnalıster, ólketanýshylar jáne egde jastaǵylar da bar.
Oqý baǵdarlamasy jaıaý ekskýrsııalar men qala boıynsha sholý baǵyttaryn uıymdastyrýdy, tarıhı oryndar týraly aqparatty tyńdaýshyǵa qyzyqty ári túsinikti jetkizýdi qamtıdy. Sabaqtardyń 60% teorııaǵa, qalǵany tájirıbege negizdelgen.
SQO týrıstik qaýymdastyǵynyń tóraǵasy Vladımır Vıtchenkonyń aıtýynsha, óńirge keletin týrıster sanynyń artýy kásibı gıdterge degen suranysty kúsheıtken. Máselen, bıyl Imantaý-Shalqar týrıstik aımaǵyna kelýshiler sany ótken kezeńmen salystyrǵanda eki esege ósken.
- Mundaı kýrstar eki jyl buryn da uıymdastyryldy. Sonyń nátıjesinde jergilikti gıdter sheteldik qonaqtardy qabyldap, olarǵa ekskýrsııa júrgizýge múmkindik aldy. Qazir týrıster sanynyń ósýine baılanysty mamandar daıarlaý erekshe mańyzǵa ıe. Óńirdiń kórikti jerleri men tarıhı oryndaryn týrısterge tanystyrýda gıdterdiń róli zor. Tarıhty áserli ári mazmundy jetkize bilý de qonaqtardyń óńirge degen qyzyǵýshylyǵyn arttyrady, - deıdi Vladımır Vıtchenko.
Kýrsty Qazaqstan gıdteri men ekskýrsııa júrgizýshileri odaǵynyń prezıdenti Saltanat Abjanova júrgizip jatyr. Ol oqý baǵdarlamasyn tájirıbeli mamandar men bul salany endi meńgerip júrgen qatysýshylardyń qajettilikterin eskere otyryp ázirlegen.
- Barlyǵyna túsinikti bolatyndaı ortaq, jan-jaqty baǵdarlama daıyndadym. Aldymen Petropavldyń tarıhı nysandaryn zerttedim. Qalada XVIII–XIX ǵasyrlarǵa jatatyn tarıhı oryndar kóp. Kýrstan ótýshiler osy nysandar týraly málimetterdi meńgerip, ekskýrsııa júrgizýdiń ádis-tásilderin tájirıbede qoldanyp úırenedi, - deıdi Saltanat Abjanova.
On kúndik oqý aıaqtalǵan soń qatysýshylarǵa halyqaralyq úlgidegi sertıfıkat tabystalady. Bul qujat olardyń kásibı biliktiligin rastap, elimizden tys jerde de ekskýrsııa júrgizýge múmkindik bermek.
Buǵan deıin medıtsınalyq týrızmdi damytý jospary ázirlengenin jazǵan edik.
