Gıdter men ekskýrsııa jetekshileriniń II elordalyq forýmy ótti
ASTANA. KAZINFORM — Búgin Prezıdenttik ortalyǵy ǵımaratynda gıdter men ekskýrsııa jetekshileriniń II elordalyq forýmy ótip jatyr. Іs-shara 21 aqpan — Búkilálemdik gıdter men ekskýrsııa júrgizýshiler kúnine oraı uıymdastyryldy.
Forýmdy Astana qalasynyń ákimdigi, «Astana Tourism» týrızmdi damytý ortalyǵy» JShS, Prezıdenttik ortalyq jáne elordalyq gıdter klýby birlesip ótkizýde. Sharaǵa 130-dan astam gıd, ekskýrsovod, mýzeı qyzmetkeri jáne týrızm salasynyń mamandary qatysty. Sonymen qatar, óńirlerden jáne shetelden kelgen tájirıbeli sarapshylar da forýmǵa shaqyrylǵan.
Forýmnyń basty maqsaty — ekskýrsııalyq qyzmet sapasyn arttyrý, gıdterdiń kásibı deńgeıin jetildirý jáne ishki týrızmdi damytý joldaryn qarastyrý.
Jıyn plenarlyq otyryspen bastaldy, onda ekskýrsııalyq qyzmetti memlekettik retteý, saladaǵy standarttar men talaptar máseleleri kóterildi.
Prezıdenttik ortalyǵynyń dırektory Baqytjan Temirbolat shara barysynda forýmnyń mańyzdylyǵyna toqtaldy. Onyń aıtýynsha, sońǵy jyldary Qazaqstanda týrızm turaqty túrde damyp keledi.
— Ótken jyly dál osy jerde elordalyq gıdter men ekskýrsııa júrgizýshileriniń I forýmy ótkizilgen edi. Sol ýaqyttan beri týrıster sany artty, olardyń geografııasy keńeıdi, salaǵa salynatyn ınvestıtsııalar kóbeıdi, ınfraqurylym damytyldy. Bul Memleket basshysy qoıǵan strategııalyq mindetterdiń naqty júzege asýynyń kórinisi. 2025 jyly otandyq týrızm salasyna salynǵan ınvestıtsııalar 1,2 trln teńgeden asyp, 2024 jylmen salystyrǵanda 32%-ǵa artty, — dedi ol.
Baqytjan Temirbolat sondaı-aq Astananyń tek Qazaqstanda emes, Ortalyq Azııadaǵy jetekshi týrıstik ortalyqtardyń biri retinde óz pozıtsııasyn nyǵaıtyp kele jatqanyn aıtty. Buǵan gıdter men ekskýrsııa jetekshileriniń joǵary kásibı daıyndyǵy men bilimi aıtarlyqtaı áser etedi.
— Gıd-ekskýrsııa júrgizýshi tek týrısterdi alyp júretin adam emes. Ol eldiń ókili, tarıhı mura álemine jol kórsetýshi, qonaqtardyń Qazaqstan týraly kózqarasyn qalyptastyratyn mádenı elshi. Onyń kásibıligi, bilimi, sheberligi men jeke qasıetteri týrısterge qaldyratyn áserdiń qanshalyqty este qalarlyq bolatynyn anyqtaıdy, — dedi Baqytjan Temirbolat.
Forýmnyń paneldik sessııalary barysynda gıdter, mýzeı ekskýrsııa júrgizýshileri jáne Visit-ortalyqtar ókilderi óz tájirıbelerimen bólisti. Birinshi sessııada mýzeılik ekskýrsııalardy uıymdastyrýdaǵy zamanaýı ádistemelik tásilder tanystyryldy, aýdıtorııamen tıimdi jumys isteý quraldary talqylandy.
Ekinshi sessııada salany zańnamalyq retteý jáne murany ınterpretatsııalaýdyń halyqaralyq tájirıbesi qaraldy. Óz tájirıbesimen Grýzııa ekotýrızm qaýymdastyǵy basqarma tóraǵasy Natalııa Bahtadze-Englender jáne Germanııadaǵy «Interpret Europe» Eýropalyq mádenı murany ınterpretatsııalaý qaýymdastyǵynyń úılestirýshisi Dýbravko Fııachko bólisti.
Astana qalasynyń Investıtsııalar jáne kásipkerlikti damytý basqarmasy basshysynyń orynbasary Maqsat Jańabaev gıdterdiń róliniń erekshe ekenin atap ótti.
— Týrıst úshin nysandardy jaı kórý jetkiliksiz. Qala tarıhyn, biregeıligin jáne qundylyqtaryn tek gıdter jetkize alady. Halyqaralyq tájirıbe kórsetkendeı, tabysty qalalyq destınatsııalar gıdterdiń kásibı qaýymdastyǵymen júıeli jumys júrgizedi. Vena, Sıngapýr, Barselona sııaqty iri týrıstik ortalyqtarda gıdter týrıstik saıasattyń seriktesteri jáne qala brendisiniń mańyzdy bóligi retinde qarastyrylady, — dedi ol.
Forýmǵa qatysýshylar ekskýrsııalyq qyzmet sapasyn arttyrý, ishki týrızmdi damytý jáne týrısterge kórsetiletin qyzmettiń sapasyn joǵarylatý máselelerin talqylady.
— Qonaqtarymyzdy qarsy alyp júrgen gıdter men ekskýrsııa jetekshileri — týrısterge qalamyzǵa ne úshin kelgenderin sezdiretin tulǵalar. Sizderdiń sózderińiz, áńgimelerińiz Qazaqstannyń beınesin qalyptastyrady. Sondyqtan gıd mamandyǵy — óte jaýapty ári bedeldi kásip. Sebebi adamdar tek estelik sýrettermen emes, júrekterinde saqtalatyn oqıǵalarmen qaıtady, — dedi «Kazakh Tourism» UK» AQ basqarma tóraǵasy Talǵat Ǵazızov.
Forým qorytyndysynda ekskýrsııalyq qyzmettiń sapasyn arttyrý, týrıstik salany damytý jáne Qazaqstannyń mádenı-týrıstik áleýetin nyǵaıtýǵa baǵyttalǵan naqty usynymdar ázirlenedi. Uıymdastyrýshylar bul usynymdardyń aldaǵy ýaqytta eldegi týrıstik saıasatqa eleýli yqpal etetinin jetkizdi.
Aıta keteıik, osyǵan deıin týrızm salasyna salynǵan ınvestıtsııa kólemi 33% artqany týraly jazdyq.