Qazaqstannyń 14 memlekettik áýejaıyna júrgizilgen aýdıt nátıjesi jarııalandy
ASTANA. KAZINFORM — Qazaqstanda memlekettik áýejaılardy tsıfrlandyrý jáne bıometrııalyq sáıkestendirý júıesin engizý máseleleri talqylandy.
Astanada Kólik mınıstrliginiń basshylyǵy men SITA kompanııasy ókilderiniń jumys kezdesýi ótti.
Kezdesýdiń negizgi maqsaty memlekettik áýejaılarǵa SITA kompanııasy júrgizgen aýdıt qorytyndylaryn talqylaý jáne azamattyq avıatsııa salasyn keshendi tsıfrlandyrý boıynsha aldaǵy strategııalyq qadamdardy aıqyndaý boldy.
Buǵan deıin Azamattyq avıatsııa komıtetiniń qoldaýymen SITA kompanııasy elimizdegi 14 memlekettik áýejaıǵa aýdıt júrgizýdi aıaqtady. Baǵalaý nátıjesine sáıkes, áýejaılardyń basym bóliginde jolaýshylarǵa qyzmet kórsetý jáne júkti óńdeýdiń negizgi júıelerimen jaraqtandyrý deńgeıi jetkiliksiz bolyp otyr (ortasha kórsetkish – 38%). Sonyń saldarynan kóptegen tehnologııalyq úderister áli de qolmen oryndalady.
Kezdesý barysynda elimizdiń áýejaılaryn ozyq tsıfrlyq júıelermen jabdyqtaý máseleleri qaraldy. Atap aıtqanda, jolaýshylardy tirkeý, júkti óńdeý jáne esepke alý protsesterin avtomattandyrý, jolaýshylar aǵynyn basqarý, sondaı-aq avıatsııalyq qaýipsizdik deńgeıin arttyrý, ushý aldyndaǵy rásimderden ótý ýaqytyn qysqartý jáne jolaýshylarǵa kórsetiletin qyzmet sapasyn jaqsartý maqsatynda zamanaýı bıometrııalyq tehnologııalardy engizý máseleleri talqylandy.
Kezdesýde Astana qalasynda áýejaılardyń tsıfrlyq júıelerin ortalyqtandyrylǵan basqarý ortalyǵyn qurýǵa erekshe nazar aýdaryldy. Bul ortalyq negizgi protsesterdi naqty ýaqyt rejıminde monıtorıngteýdi, úılestirýdi jáne jedel basqarýdy qamtamasyz etedi.
Talqylaýdyń jeke baǵyty retinde SITA kompanııacynyń Qazaqstanda salynyp jatqan úsh áýejaıdy – Zaısan, Kendirli jáne Katonqaraǵaıdaǵy áýejaılardy – zamanaýı tsıfrlyq sheshimdermen jabdyqtaýǵa qatysý máselesi qarastyryldy. Taraptar atalǵan áýejaılarda halyqaralyq standarttarǵa sáıkes jolaýshylardy tirkeý, bagajdy óńdeý, jolaýshylar aǵynyn basqarý, bıometrııalyq sáıkestendirý júıeleri men basqa da tsıfrlyq servısterdi qamtıtyn keshendi tehnologııalyq sheshimderdi engizý múmkindigin talqylady.
Kezdesý qorytyndysy boıynsha taraptar Qazaqstannyń avıatsııa salasyn tsıfrlandyrýǵa, avıatsııalyq qaýipsizdik deńgeıin arttyrýǵa jáne jolaýshylarǵa kórsetiletin qyzmet sapasyn jaqsartýǵa baǵyttalǵan birlesken jobalardy iske asyrý jáne ózara yntymaqtastyqty odan ári damytýǵa múddeli ekenin rastady.
Aıta ketelik Oljas Bektenov elde shaǵyn avıatsııany damytý qajet ekenin aıtqan edi.
