Gıdrotsıklmen júıtkigen áje: Qulasam sýǵa qularmyn dep aıdap kettim
ASTANA. KAZINFORM — Áleýmettik jelide 82 jastaǵy ájeıdiń gıdrotsıklmen júıtkip júrgen vıdeosy keń taralyp jatyr. Jibek Joly arnasynyń «Búgin LIVE» baǵdarlamasy 12 balasy, 23 nemeresi, 30 shóberesi bar keıýananyń ózimen onlaın baılanysqa shyǵyp, tildesip kórdi.
— Meni ákem soǵystan kelgende jastaıymnan atqa mingizip úıretken. Ýaqytynda velosıped te ápergen. Jastyq shaǵymda sonyń bárin kórgenmin ǵoı. Odan keıin Alla buıyrtyp, turmysqa shyqtym. Qudaıdyń bergen 12 balasyn ósirip, jetkizdim. «Batyr ana» atandym. Olardy jumysymmen qabattastyryp júrip tárbıeledim. Depýtat bolyp ta saılandym. Jaqsy eńbegimniń arqasynda Máskeýge de jiberdi. Solaı eldiń, halyqtyń kótermeleýimen ózimdi baqytty sanadym. Zeınetke shyqqasyn balalarymnyń arqasynda sheteldi de araladym. Egıpette «Sýdyń astyna túsip kóresiz be?» degende, sýdyń astyna da tústim. Sodan keıin gıdrotsıkl degen ne turady, ony da kóreıin dep, táýekel etip mindim. Odan alǵan áserim qatty unady. Kóldiń ústinde aınalyp júrgen erekshe eken. Qulasam, sýǵa qularmyn, táýekel dedim de, aıdap kete berdim, — deıdi Jadyra Janıman.
Al ájeıdiń gıdrotsıkldi júıtkitken vıdeosyn janynda otyrǵan ınstrýktor jigit taspalap, áleýmettik jelide jarııalaǵan eken.
— Artymda bir bala vıdeoǵa túsirip otyrdy. Ol mennen: «Apa, aıdaýdy qaıdan bilesiz?» dep surady. Men: «Bárin bilemin, bárin aıdap kórgem», — dedim de, kete berdim. Erteńine qyzymnyń telefonynan kórdim. «Apa, sizdi Instagram-ǵa shyǵaryp jiberipti», — dedi. Meniń gıdrotsıkl aıdaǵanym halyqqa tanymal bolypty. Endi halyqqa, jastarǵa úlgi bolsyn, — deıdi jeli juldyzy.
Aıta keteıik, Mońǵolııada 100-degi áje shabandozdar festıvaline qatysty.