«Gıdrotehnıkalyq ǵımarattardyń qaýipsizdigi týraly» jeke zań qabyldaý qajet
ASTANA. Qazannyń 19-y. QazAqparat /Muratbek Maqulbekov/ - «Gıdrotehnıkalyq ǵımarattardyń qaýipsizdigi týraly» jeke zań qabyldaý qajet. QR Aýyl sharýashlyǵy mınıstrliginiń Sý resýrstary jónindegi Komıtetinde «Qazaqstan Respýblıkasyndaǵy gıdrotehnıkalyq ǵımarattardy qaýipsizdikpen qamtamasyz etý» taqyrybynda ótken ulttyq keńesti asha otyryp, QR aýyl sharýashylyǵy vıtse-mınıstri Marat Orazaev osylaı dep málim etti.
Keńes barysynda Reseı jáne Fınlıandııa Úkimetteriniń qarjylaı qoldaýymen Aral teńizi basseıni elderi úkimetiniń kelisimi boıynsha Birikken Ulttar Uıymynyń Eýropalyq ekonomıkalyq komıssııasy júzege asyryp otyrǵan Ortalyq Azııadaǵy gıdrotehnıkalyq ǵımarattardyń qaýipsizdigi jónindegi Aımaqtyq jobanyń aldyn ala shyǵarylǵan nátıjeleri talqylandy. Sonymen qatar, gıdrotehnıkalyq ǵımarattardyń qaýipsizdigi salasyndaǵy aımaqtyq yntymaqtastyq máseleleri men normatıvtik-quqyqtyq bazany jetildirý jónindegi usynystar da talqyǵa tústi.
«Sý resýrstary jónindegi komıtet 2008 jyly «Gıdrotehnıkalyq ǵımarattardyń qaýipsizdigi týraly» Zańnyń jobasyn ázirlegen bolatyn. Zańnamalyq jumys jónindegi vedomstvoaralyq komıssııanyń usynysyn eskere otyryp, Úkimet jeke zań qabyldaý maqsatty emes degen sheshim shyǵaryp, zań jobasy 2009 jyldyń basynda qabyldanǵan Sý kodeksine engizilgen túzetýler retinde engizildi», - dedi M.Orazaev.
Vıtse-mınıstrdiń sózine qaraǵanda, gıdrotehnıkalyq ǵımarttardyń qaýipsizdik máseleleri jónindegi eki jyldaı ýaqyt boıy júrgizilgen tájirıbe atalmysh másele boıynsha jeke zań qabyldaý múmkindigin qaıta qarastyrý kerek ekenin jáne qazirgi zańnamaǵa túzetýler engizý qajet ekendigin kórsetip otyr.
