Gıdrotehnıkalyq nysanǵa bólingen qarjyny jymqyrǵandar áli qamaýǵa alynbady — agenttik
ASTANA. KAZINFORM — QR Qarjylyq monıtorıng agenttigi tóraǵasynyń orynbasary Jeńis Elemesov sý tasqynyna qarsy jumystarǵa bólingen qarajat qaı kezde jymqyrylǵany týraly túsinik berdi.
«Bizdiń vedomstvo gıdrotehnıkalyq qurylystardy salýǵa bólingen bıýdjettik qarajatqa qatysty 4 qylmystyq isti tirkedi. Ulytaý, Aqtóbe, Qyzylorda oblystarynda jáne Almatyda osy ister tergelip jatyr. Bul qylmystyq isterdiń basym bóligi bıýdjet qarajatyn urlaý faktileri boıynsha qozǵalǵan. Bir jaǵdaıda arnaıy osy bógetterdi kútip ustaýdaǵy zańsyz áreketter sebep boldy. Osy ister boıynsha 1 mlrd teńge shamasynda zalal keltirilgeni anyqtaldy», — dedi J. Elemesov Parlament Májilisinde tilshiler suraǵyna jaýap bere otyryp.
Onyń aıtýynsha, bul zańsyz áreketter ótken jyldary jasalǵan. Bul qarjy gıdrologııalyq nysandardy kútip ustaýǵa birneshe jyl buryn qarastyrylǵan edi.
«Osy qarajat bıylǵy kóktemtegi sý tasqynyna qarsy bólingen 140 mldr teńgege qatysy joq. Qazir ıgerilip jatqan osy qarajattyń maqsatty jumsalýyna monıtorıng jasaımyz, ıaǵnı zańsyz áreketterge tosqaýyl qoıamyz», — dedi agenttik ókili.
Sonymen qatar ol Ulytaý, Aqtóbe, Qyzylorda oblystarynda jáne Almatyda 1 mlrd teńgeni jymqyrý oqıǵasy boıynsha kúdiktiler anyqtalǵanyn aıtty.
«Kúdikke ilingender arasynda tıisti tenderlerdi alǵan kásipkerler de, sondaı-aq oryndalǵan jumystardyń aktisine qol qoıǵan laýazym ıeleri de bar. Qazir olar tutqynǵa alynbady. Sebebi sý tasqyny atalǵan óńirlerde áli de bolyp jatqandyqtan, keıbir adamdar sý basqan jerlerlerde qyzmetin atqaryp jatyr. Qazir tek qylmystyq isterdi tirkedik jáne tergeý protsesi júrip jatyr», — dedi Jeńis Elemesov.
Budan buryn habarlanǵandaı, Qarjylyq monıtorıng agenttigi gıdrotehnıkalyq nysandardy salýǵa bólingen qarajattyń jumsalýyn tekseredi. Qarjylyq monıtorıng organdary Almaty qalasynda, Aqtóbe, Qyzylorda jáne Ulytaý oblystarynda jymqyrý belgileri boıynsha 4 is qozǵady. 5 adam kúdikti dep tanyldy. Zalaldyń jalpy somasy 1 mlrd teńgeden asty.
