Gıdrotehnıkalyq nysandardy tekserý sapasyz atqarylyp otyr – senator

ASTANA. KAZINFORM – Qazaqstanda gıdrotehnıkalyq qurylystardy paıdalaný jáne jóndeý salasynda kóptegen zań buzý derekteri anyqtalyp otyr. Senator Andreı Lýkın Úkimet basshysynyń atyna depýtattyq saýal joldady.

Лукин
Фото: gov.kz

Depýtattyń aıtýynsha, eldi mekenderdi sel men sý tasqynynan qorǵaýǵa arnalǵan nysandar tıisti baqylaýdan tys qalǵan. Tekserýler tek atústi júrgiziledi, al jóndeý jumystary keıinge shegeriledi.

- Gıdrotehnıkalyq qurylystardy tekserý jumystary tek qaǵaz júzinde ǵana bar. Sońǵy úsh jylda josparǵa 729 nysan engizilgenimen, is júzinde bul jumystar oryndalmaǵan. Mysaly, 2021 jyly Úlken Almaty ózeniniń basseınin tekserý boıynsha eki akt jasaldy, alaıda olardyń arasyndaǵy aıyrmashylyq bir aı bolsa da, eki jaǵdaıda da birdeı fotomaterıaldar tirkeýge alynǵan. Mundaı jaǵdaılar basqa nysandarda da, onyń ishinde Aqsaı ózenindegi qorǵanys bógeti men Kishi Almaty ózeniniń arnasyn turaqtandyrý jumystarynda da kórinis taýyp otyr, – dedi A.Lýkın.

Jańa nysandardy jobalaý men salý barysynda da zań buzý derekteri anyqtalǵan. Úlken Almaty ózeniniń basseınindegi sel bógetin salý kezinde aımaqtaǵy tektonıkalyq jaryqtardyń bar ekeni eskerilmegen. Seısmıkalyq qaýipti aımaqta qurylys salýǵa múlde jol berilmeýi kerek. Sonymen qatar, bas merdiger jumystardyń 95 paıyzyn qosalqy merdigerge bergen, bul zańnamaǵa qaıshy. Tekserý nátıjesinde joba boıynsha oryndalmaǵan jumystardyń quny 2,2 mıllıard teńgeni quraǵany anyqtaldy.

- Táýelsiz sarapshylardyń qatysýymen barlyq gıdrotehnıkalyq qurylystardyń jaǵdaıyna tolyq tekserý júrgizýdi, apatty nysandardy jedel jóndeý josparyn ázirlep, qarjylandyrýdy qamtamasyz etýdi, tabıǵı apattardyń aldyn alý jáne saldaryn joıý jóninde memlekettik baǵdarlamalardyń oryndalýyna baqylaýdy kúsheıtýdi, sondaı-aq jobalaý men qurylys kezindegi zań buzý derekterin muqııat zertteýdi, bul rette laýazymdy tulǵalardyń jaýaptylyq dárejesin anyqtaýdy qajet dep sanaımyz, – dedi senator.

Aıta keteıik, osyǵan deıin Sý resýrstary jáne ırrıgatsııa mınıstrliginiń basseındik ınspektsııalary Tótenshe jaǵdaılar mınıstrligi jáne jergilikti atqarýshy organdarmen birlesip elimizdegi 1502 gıdrotehnıkalyq qurylysqa zerdeleý júrgizgeni málim boldy. 

Сейчас читают