Gıdrotehnıkalyq nysandar: Toqtap turǵan 10 joba qurylysy qaıta qolǵa alynbaq
ASTANA. KAZINFORM — Sý resýrstary jáne ırrıgatsııa mınıstrligi qurylysy aıaqtalmaǵan 10 jobany qaıta qolǵa alyp, qoldanysqa berýdi josparlap otyr
Byltyr Sý resýrstary jáne ırrıgatsııa mınıstrliginiń Sý sharýashylyǵy komıteti gıdrotehnıkalyq nysandardy salý jáne rekonstrýktsııalaýǵa qatysty uzaq ýaqyttan beri aıaqtalmaı turǵan jobalardy júzege asyrý algorıtmin ázirledi. Osy algorıtmge sáıkes, 2010-2020 jyldary bastalyp, túrli sebepterge baılanysty toqtap qalǵan 10 joba boıynsha qurylys-montaj jumystaryn qaıta bastaý jáne tolyq aıaqtaý josparlanyp otyr. Olardyń qatarynda Qyzylorda jáne Túrkistan oblystarynda ornalasqan alty kanaldy rekonstrýktsııalaý jáne jańǵyrtý jobasy, Aqmola oblysyndaǵy eki sý qoımasyn rekonstrýktsııalaý, Abaı oblysyndaǵy bóget gıdrotorabyn rekonstrýktsııalaý jáne Almaty oblysyndaǵy sý alý nysanyn elektrmen qamtamasyz etý jobasy bar.
2025 jyly barlyq nysannyń tehnıkalyq jaǵdaıyna tekserý júrgizilip, atqarylǵan jáne sońyna deıin jetkizilmegen jumystardyń kólemi anyqtaldy.
Sondaı-aq memlekettik sáýlet-qurylys baqylaý organdarynyń nusqamalary alynyp, jobalaý-smetalyq qujatty túzetýge arnalǵan tehnıkalyq tapsyrmalar ázirlendi. Qujattardy túzetý jumystary bıylǵy birinshi jartyjyldyqtyń sońyna deıin aıaqtalady dep josparlanyp otyr.
— Bul jobalardy iske asyrý gıdrotehnıkalyq nysandardyń qaýipsiz paıdalanylýyn qamtamasyz etýge, apattyq táýekelderdiń aldyn alýǵa, sýdy avtomattandyrylǵan esepke alý júıelerin engizýge jáne sý shyǵynyn azaıtýǵa múmkindik beredi. Nátıjesinde aýyl sharýashylyǵy alqaptaryn sýmen qamtamasyz etý sapasy jaqsaryp, ónimdilik artady jáne óńirlerdiń áleýmettik-ekonomıkalyq turaqtylyǵy nyǵaıady, — dedi Sý resýrstary jáne ırrıgatsııa mınıstri Nurjan Nurjigitov.
Budan buryn Qazaqstanda 42 jańa sý qoımasy salynatyny aıtyldy.
