GGG promoýteri «Kanelomen» úshinshi aıqas jaıynda málimdeme jasady

ASTANA. QazAqparat - Promoýter Tom Leffler Gennadıı Golovkın men Saýl «Kanelo» Alvarestiń úshinshi jekpe-jegi burynǵy chempıonǵa qaraǵanda meksıkalyq boksshyǵa kóbirek qajet ekenin aıtty, dep jazady Sports.kz.

Boksshylardyń alǵashqy aıqasy teń nátıjemen aıaqtalsa, ekinshi aıqasta tóreshiler jeńisti Alvareske bergen bolatyn.

«Gennadıı «Kanelomen» jekpe-jekke árdaıym daıyn. Biz Golovkın ony eki ret jeńdi dep sanaımyz. Úshinshi ret aıqas ótkizbeýge eshqandaı sebep joq. Sondaı-aq, biz buǵan GGG-ge qaraǵanda «Kanelo» múddeli dep esepteımiz. Sebebi, Saýl óz jankúıerlerine ádil jáne adal túrde jeńgenin dáleldeýi kerek.

Alǵashqy aıqas jaqsy boldy, ekinshisi odan da keremet. Úshinshi jekpe-jek bárinen de qyzyqty bolady dep oılaımyn. Ony jasaı alamyz ba, kóremiz. Men Golden Boy Promotions prezıdenti Erık Gomespen únemi baılanystamyn. Trılogııany uıymdastyra alamyz ba, kóre jatarmyz», - dedi Leffler ESPN Deportes-ke bergen suhbatynda.