GGG promoýteri Alvarestiń kúmándi qolǵabyna qatysty pikir bildirdi

ASTANA. QazAqparat - Gennadıı Golovkınniń promoýteri Tom Leffler (38-0-1, 34 KO) Golovkınniń komandasy Saýl Alvarestiń (49-1-2, 34 KO) qolǵabyna bildirgen shaǵymyna qatysty pikirin aıtty, dep habarlaıdy «SPORTINFORM». 

«Meniń túsingenim, «Kanelo» óz bapkeriniń arnaıy tigip bergen qolǵabymen bokstaspaqshy. Olar Golovkınge qarsy jekpe-jekte sony paıdalanbaq. Nevada shtatynyń komıssııasy (...) ol qolǵapty qoldanýǵa ruqsatyn berdi, biraq Golovkınmen jekpe-jekte onyń qolǵabyn paıdalanýǵa tyıym saldy, óıtkeni bul qolǵap burynǵy jekpe-jekterde qoldanylmaǵan (...). Golovkınniń komandasy qolǵapqa shaǵym bildirgeni týraly aqparat qaıdan shyqqanyn bilmeımin. Sheshimdi Nevada shtatynyń komıssııasy shyǵarǵan», - dedi Tom Leffler.

Ol «Kanelo» jańa brendtiń qolǵabyn aldymen basqa jekpe-jekterde paıdalanýy tıis.

«Qalaı bolatynyn kórsin, sodan keıin komıssııa sheshim qabyldasyn. Mundaı úlken jekpe-jekke boksshy tekseristen ótpegen qolǵabymen shyǵýdy qalaıtyny buryn tarıhta bolǵan emes, menińshe. Golovkın buryn judyryqtasqan, basqa boksshylardy nokaýtqa jibergen qolǵabymen shyǵady. Qolǵap pen teıp máselesinde bizge eshqashan artyq suraq bolǵan emes», - deıdi promoýter.

«Kanelonyń» qolyndaǵy teıpke bildirilgen shaǵymǵa qatysty pikirin bólisken Tom Leffler dál osy shaǵym Nevada shtatynyń komıssııasyna kóbirek tıesili ekenin atap kórsetti. Óıtkeni komıssııa basqa shtattarda, Brıtanııa, Kanada, Meksıka elderinde tyıym salynǵan mundaı teıpterdi qoldanýǵa ruqsat bergen.

«Gennadıı basqa ıýrısdıktsııalarda jekpe-jek ótkizgende, mundaı teıpterge eshqashan ruqsat etilmegen. Abeldiń (Golovkınniń bapkeri) munshalyqty tań-tamasha bolyp, shaǵym aıtqany - sondyqtan. Ol komıssııa bul máselede qatelesip jatqanyn aıtty, biraq mundaı jekpe-jekterde búkil álemde júretin normalar saqtalýy tıis. Aıtpaqshy, Lıam Smıt te (Alvarestiń teıpine) shaǵym bildirgen bolatyn, al ol - brıtanııalyq», - deıdi promoýter.