GGG nómirli kólikti júrgizgen elordalyq ustaldy
NUR-SULTAN. QazAqparat – Elordada «Qaýipsiz jol» respýblıkalyq jedel aldyn alý sharasynyń aıasynda eki kún ishinde 500-ge jýyq jol erejesin buzý faktisi anyqtaldy, dep habarlaıdy QazAqparat tilshisi.
Atalǵan zańsyzdyqqa jol bergen kólik júrgizýshilerdiń ishinde temir tulparyna GGG áripti nómir japsyryp alǵan Mercedes-Benz ıesi de bar.
«Polıtsııa qyzmetkerleri tún ortasynda atalmysh kólikti toqtatyp, qujattaryn tekserý kezinde avtomobıldegi tirkeý belgileri esepten shyǵarylǵany anyqtaldy. Al GGG áripti nómirdi ol basqa adamnan satyp alǵany belgili boldy.
26 jastaǵy júrgizýshiniń úsitnen standarttyń talaptaryna sáıkes kelmeıtin nómirlik belgileri bar avtokólik júrgizgeni úshin Ákimshilik quqyq buzý týraly kodekstiń 590-baby 4-bóligi boıynsha ákimshilik óndiris qozǵaldy. Materıal protsessýaldyq sheshim qabyldaý úshin Nur-Sultan qalasynyń mamandandyrylǵan ákimshilik sotyna jiberildi. Avtokólik kommýnaldyq turaqqa qoıyldy», - dep jazady qalalyq polıtsııa departamentiniń baspasóz qyzmeti.
Elordada «Qaýipsiz jol» respýblıkalyq jedel aldyn alý sharasy áli ótip jatyr. Eki kún ishinde polıtsııa qyzmetkerleri 500-ge jýyq jol erejesin buzý oqıǵasyn tirkegen. Onyń ishinde 79 jaıaý júrginshi bar. Eki kúnde 3 jol-kólik oqıǵasy tirkelip, 3 adam zardap shekken. Ereje buzǵany úshin 8 nómirlik belgi alynyp, 7 avtokólik kommýnaldyq turaqqa qoıyldy.
