GGG men Alvares jekpe-jeginde ádil tórelik bola ma - sarapshy pikri
ASTANA. QazAqparat - Amerıkandyq boks sholýshysy Maıkl Montero «Dúısenbi kúngi poshta» aıdarynda óz oqyrmandarynyń hattaryna jaýap berip, 16 qyrkúıek kúni ótetin Gennadıı Golovkın men Saýl Alvares arasyndaǵy jekpe-jek jaıly óz pikirimen bólisti, dep habarlaıdy Sports.kz.
Maıkl Montero: «Gennadıı Golovkın Las-Vegas qalasynda birde bir jekpe-jek ótkizgen emes. Al «Kanelo» bul óńirde 8 ret bylǵary qolǵap túıistirgen. Meksıkalyq sportshy 2012 jyldan bastap jergilikti jankúıerler men tóreshilerdiń qoldaýyna ıe bolyp keledi. Sol sebepti 16 qyrkúıek kúni ótetin jekpe-jektegi tórelik máselesi barlyǵyn alańdatyp otyr. Men Gennadıı Golovkın men onyń bapkeri Abel Sanchespen bir-eki apta buryn sóılestim. Olar saıysqa saqadaı saı jáne ózderin tolyq senimidi sezinetinderin jetkizdi. Degenmen Nevada qazylary tórelikterin túrlendirip jiberýi bek múmkin. Bulaı deýimizge mysaldar da jeterlik» dep jazǵan bolatyn.
Boks sholýshysynyń aıtýynsha, «Ýord - Kovalev» aıqasynda ol sharshy alańnyń janynda júrip, tóreshiler ataǵy basym boksshynyń (Ýord - eskertý) yńǵaıyna jıi jyǵylatynyn baıqap qalypty.
«Kanelo men Golovkınniń kezdesýi uqsas jaǵdaı. Kezdesýde óz beldigin sarapqa salyp, táýekelge baratyn joıqyn soqqy sheberleri bolady (Golovkın, Kovalev), mańyzdy jekpe-jekter ótkizýde úlken tájirıbe jınaqtaǵan Ýord, Alvares sekildi boksshylar bar... Bul kezdesýdi daıyndyq kezeńinen bastap mıllınondaǵan adam jiti baqylap otyr. Sondyqtan Ýord pen Kovalev matchyndaǵy bireýge búıregi burý oqıǵalary bolmaıtynyna sengimiz keledi. Nevada tóreshileri týra joldan taımaı, ádil qazylyq jasaıdy dep úmittenemiz», - dep atap ótti ol.
