GGG «Kanelodan» jeńilgennen keıingi josparymen bólisti

ASTANA. QazAqparat - Seısenbi kúni orta salmaqtaǵy burynǵy álem chempıony Gennadıı Golovkın promoýteri Tom Lefflermen kezdesip, aldaǵy josparlaryn talqylady, dep habarlaıdy Sports.kz.

15 qyrkúıekte Gennadıı tóreshilerdiń sheshimimen Saýl «Kanelo» Alvaresten jeńilip, WBA (Super), WBC jáne IBO belbeýlerinen aıyrylǵan edi.

Leffler GGG-men ne týraly áńgimeleskenin aıtty:

«Gennadıı barlyǵyn oı eleginen ótkizý úshin az ýaqyt úzilis alady. Ol qashan bokstasqysy keletinin aıtqan joq. Negizi Gennadıı tóreshilerdiń sheshimine áli de renjýli. Biraq, men ony bıyl aıqasady dep oılamaımyn».

«Kanelomen» úshinshi aıqasqa keler bolsaq, ol - bokstaǵy eń mańyzdy jekpe-jekterdiń biri. Úshinshi kezdesýdi qashan uıymdastyrý kerektigin jaqsylap egjeı-tegjeıli oılastyrý kerek. 

Jankúıerler - sporttyń ómirlik kúshi, olar tóreshilerdiń sheshimine narazy boldy. Sondyqtan, úshinshi aıqasty kórgileri keledi. Birinshi jekpe-jekke qaraǵanda ekinshi aıqastyń nátıjesine kóbirek qarsylyq tanytty, sebebi bul joly Gennadıı óz tıtýldarynan aıyryldy. Eger jankúıerlerdiń áleýmettik jelige jazǵandaryn qarasańyz, olardyń bári GGG-di jeńdi dep esepteıdi nemese óz tıtýldaryn saqtap qaldy dep sanaıdy», - dep keltirdi Boxingscene.com Lefflerdiń sózin.