GGG-Kanelo revanshy boıynsha kelissózder aıaqtalýǵa jaqyn - Erık Gomes

ASTANA. QazAqparat - Buǵan deıin meksıkalyq boksshynyń menedjeri Hose Reınoso revanshqa qatysty kelissózderdiń nátıjesiz bolyp jatqanyn jetkizgen, dep habarlaıdy QazAqparat tilshisi.

«Dál qazir bizde eshteńe joq. Biz kelissózderdiń durys baǵytta órbigenin kútip otyrmyz. Alaıda ázirshe naqty eshteńe aıta almaımyz», - degen bolatyn H.Reınoso.

Araǵa úsh kún salyp, «Golden Boy Promotions» kompanııasynyń prezıdenti Erık Gomes kelissózderdiń aıaqtalýǵa jaqyn ekenin málimdedi.

Onyń aıtýynsha, eki jaq kelisimshartty rásimdeýge daıar. Alaıda áli pysyqtaıtyn máseleler bar.

«Biz kelisimdi rásimdeýge jaqyndap qaldyq. Kelissózderdi júrgizip jatyrmyz. Revanshtyń ótetin jeri bolsa, áli anyqtalǵan joq», - dep atap kórsetti E.Gomes Fightnights.com-ǵa bergen suhbatynda.

Aıta keteıik, meksıkalyq boksshy Saýl Alvarestiń komandasy GGG-ge qarsy revanshty burynǵy jerde ótkizýge múddeli.

Las-Vegasta ótken alǵashqy jekpe-jekte Golovkın men Alvares teń túsken bolatyn. Alaıda tanymal sportshylar men kásibı sarapshylar tóreshiler sheshimimen kelisken joq. Bir tóreshi jeńisti Alvareske (118-110) berse, ekinshisi Golovkın (113-115) jeńdi dep sheshti. Al úshinshisi 114-114 esebin tirkedi. Ásirese, 118-110 esebin shyǵarǵan Adelaıda Berdqa qarsy halyqtyń narazylyǵy qatty boldy. Don Trellanyń 114-114 esebi de qısynsyz bolyp shyqty.

Boks salasynyń sholýshysy, tanymal reseılik sarapshy Aleksandr Belenkııdiń oıynsha, Golovkın - Alvares jekpe-jeginde jeńisti meksıkalyq boksshyǵa berip qoıǵan bir tóreshiniń ádiletsiz sheshimi - tamasha oılastyrylǵan jospar. Onymen Alverestiń komandasy halyqtyń kóńilin basqa jaqqa buryp jiberdi.