GGG Gollıvýd juldyzyna qoltańbasy qoıylǵan qolǵapty syıǵa tartty

ASTANA. QazAqparat - WBA (Super), IBO, WBC jáne IBF tujyrymdary boıynsha orta salmaqtaǵy álem chempıony, qazaqstandyq kásipqoı boksshy Gennadıı Golovkın (37-0-1, 33 KO) tanymal amerıkalyq akter jáne prodıýser Mark Ýolbergpen kezdesti, dep habarlaıdy SPORTINFORM SAA.

Bul týraly GGG Tvıtterde jazdy. Gennadıı Golovkın Gollıvýd juldyzyna qazaqtyń oıý-órnegi men óziniń qoltańbasy qoıylǵan bylǵary qolǵabyn syıǵa tartty.

«Shynaıy adam jáne naǵyz chempıon @markwahlberg, seni kórgenime qýanyshtymyn», - dep jazdy Golovkın birge túsken sýrettiń astyna.

Aıta keteıik, 2010 jyly Mark Ýolberg «The Fighter» bıografııalyq fılminde Mıkkı Ýordtyń rólin somdaǵan edi.

Byltyr qyrkúıekte Mark Ýolberg áleýmettik jelide meksıkalyq Alvarespe aıqastan keıin Golovkınge qoldaý kórsetken edi.

Eske salaıyq, qazaqstandyq Gennadıı Golovkın men meksıkalyq Saýl Alvares arasyndaǵy ekinshi jekpe-jek 5 mamyrda Las-Vegastaǵy T-Mobile Arena-da ótedi. Alǵashqy resmı baspasóz máslıhaty Los-Andjeleste (Astana ýaqytymen 28 aqpan kúni tańerteń) 27 aqpanǵa josparlanǵan.