GGG-diń promoýteri Lefflerdiń jeke kompanııasy nemen aınalysady
ASTANA. QazAqparat - Tom Leffler óziniń «360 Promotions» promoýterlik kompanııasyna 3-4 myqty boksshyny tartýdy kózdeıdi. Alaıda Gennadıı Golovkınmen aradaǵy áriptestikti de jalǵastyratyn bolady, dep habarlaıdy QazAqparat tilshisi.
Onyń aıtýynsha, «K2 Ukraine»-men áriptestik baılanystar úzilmeıdi. Leffler burynǵydaı Gennadıı Golovkın, Aleksandr Ýsık, Sessılııa Brekhýs syndy boksshylardy keńinen tanytý jumystarymen aınalysatyn bolady. Aldaǵy maqsat - GGG-diń Saýl Alvareske qarsy revanshyn uıymdastyrý. «Al «360 Promotions»-tiń jumysyn birge alyp júrý máselesine keler bolsaq, ol jaǵynan eshqandaı qıyndyq bolmaıdy dep oılaımyn. Men 50 boksshymen kelisimge otyraıyn dep jatqan joqpyn ǵoı. Biz 3-4 myqty sportshyny tartyp, solarmen tyǵyz jumys isteıtin bolamyz. Golovkındi álemge qalaı tanyttyq, olardy da solaı tanytatyn oıymyz bar», - dedi T. Leffler FightNews saıtyna bergen suhbatynda.
Promoýterdiń sózine qaraǵanda, kompanııa daryndy boksshylardy iriktep alýǵa tyrysady. Ol úshin árbir boksshyǵa qatań talaptar qoıylady. «Jigitterdiń boıynda daryn ǵana emes, úzdiksiz jumys isteýge degen qulshynys bolýy qajet. Men árbir boksshynyń rıngten tys jerde nemen aınalysatynyna da basa nazar aýdaramyn. Qolymnan keletin jumystyń bárin isteımin, esesine boksshydan da sony talap etemin», - dep atap kórsetti T. Leffler.
Aıta keteıik, búginde qazaqstandyq boksshy Gennadıı Golovkın «K2 Ukraine» promoýterlik kompanııasymen jumys isteıdi. Ony aǵaıyndy Klıchkolar qurǵan bolatyn. Degenmen, Golovkınniń «GGG Promotions» kompanııasy da bar.
