«GGG» dáýiri aıaqtaldy ma - Álemdik boks sarapshylarynyń pikiri
Aıta keteıik, Gennadıı Golovkın 6 qazan kúni orta salmaqta IBF jáne IBO chempıondyq beldikterin sarapqa salyp, tóreshiler sheshimimen (114-113, 115-112, 115-112) jeńiske jetken bolatyn. Alaıda qazaqstandyq boksshy jekpe-jekte ózine kóp soqqy ótkizip, burynǵydaı qarsylasyn aıqyn basymdyqpen jeńe almaǵany anyq baıqaldy. Jalpy Golovkın sporttyq mansabynda eń qıyn jekpe-jek ótkizgenin moıyndady. Sondaı-aq «GGG» Sergeı Derevıanchenko qurmetke laıyq qarsylas ekenin de aıtty.
Burynǵydaı aıqyn basymdyq joq
Boxingscene portalynyń sport tilshisi jáne kommentator Korı Erdman Golovkın-Derevıanchenko jekpe-jeginen keıin qazaqstandyq boksshy aıqyn basymdyqpen jeńiske jete almady dep sanaıdy.
Onyń pikirinshe, Gennadıı Golovkın alǵashqy raýndtardan keıin basymdyq kórsete almaı, ózine kóp soqqy darytyp aldy. Qazaqstandyq 12 raýndqa deıin bokstasqanymen, shabýyly jáne aýyr soqqylary burynǵy kezdesýlerine qaraǵanda edáýir azaıǵan.
«Árıne, bul jerde qarsylastyń áleýeti de joǵary boldy. Golovkınniń birneshe jyl burynǵy fızıkalyq jaǵdaıy jaqsyraq edi. Eger Derevıanchenko Golovkınmen Denıel Djeıkobs jáne Saýl Alvaresten buryn judyryqtassa, onyń eń myqty qarsylasy bolary anyq. Sebebi ol - orta salmaqtaǵy eń myqty boksshylardyń biri»,- dedi Korı Erdman.
Jańa taktıka shabýylǵa áser etti
Gennadıı Golovkın jattyqtyrýshysy Djonaton Benks bul jekpe-jekte qorǵanysqa kóńil bólgenin aıtady. Sondyqtan CompuBox (Computerized punches scoring system) statıstıkasynan «GGG» qarsylasqa baǵyttaǵan djeb (Jab) sany aıtarlyqtaı azaıǵanyn baıqaı alamyz.
Salystyratyn bolsaq, Golovkın - «Kanelo» rematchynda qazaqstandyq boksshy qarsylasqa 547 djeb soqqysyn baǵyttaǵan bolatyn. Al Derevıanchenkoǵa qarsy jekpe-jekte Golovkın 406 djeb baǵyttap, 107-sin dál tıgizgen.
Jekpe-jektiń qazaqstandyq boksshyǵa aýyr tıgeniniń bir sebebi - qarsylastyń ishke jáne basqa baǵyttaǵan aýyr soqqylarynyń kóptigi. Aýyr soqqy Golovkınniń fızıkalyq kúshine jáne jyldamdyǵyna aıtarlyqtaı áser etti.
CompuBox statıstıkasy kórsetkendeı, «GGG» 12 raýndta 314 aýyr soqqy baǵyttap, 136 soqqyny dál tıgizdi. Al qarsylasy 472 aýyr soqqy baǵyttap, onyń 183-in daryta bilgen. Buǵan deıin Golovkın eshbir qarsylasynan ondaı aýyr soqqylar almaǵan edi.
Golovkın qartaıǵandaı kórindi...
Golovkın - Derevıanchenko jekpe-jeginen keıin tanymal boksshylar beldesý týraly óz oılarymen bólisti.
«37 jasqa kelgen Golovkın qartaıǵandaı kórindi. Ol alǵashqy raýndtarda jaqsy bokstasqanymen, Derevıanchenko 5-raýndtan bastap kush ala bastady. Ásirese osy raýndta ol Golovkınniń ishine aýyr soqqy jasady. Osydan keıin GGG sharshap qaldy. Derevıanchenko jeńiske jete almasa da tamasha óner kórsetti, endi onyń tabysy aıtarlyqtaı joǵarylaıdy», - deıdi 2013 jyly Golovkınnen jeńilgen aǵylshyn boksshysy Mettıý Maklın (35-6, 22KO).
Jeńil salmaqta WBC tujyrymy boıynsha álem chempıony Devın Haneıdiń (23-0,15KO) aıtýynsha, jekpe-jekte teń nátıje tirkelý kerek edi.
«Golovkınniń jekpe-jegine kóńilim tolmady. Buǵan deıin ol Derevıanchenkony jekpe-jektiń ekinshi jartysynda nokaýtqa jiberedi dep topshylaǵan edim. Meniń oıymsha, olar teń tústi. Ol endi Alvaresti jeńe almaıdy», - dedi amerıkalyq boksshy.
Aýyr salmaqtaǵy amerıkalyq boksshy Djarrell Mıller Derevıanchenko jeńiske jetti dep sanaıtynyn jasyrmady. Onyń pikirinshe, Golovkınge qaraǵanda qarsylasy kóbirek belsendi boldy.
«GGG» dáýiri aıaqtaldy ma?
Gennadıı Golovkın 37 jasta. Boks sporty úshin jas mańyzdy ról atqaratyny belgili. Odan bólek, «GGG»-dyń kásipqoı mansabynda eń myqty qarsylastar sońǵy birneshe jylda paıda boldy. Uzaq jyldar boıy orta salmaqta ustemdik etýi oǵan taktıka jáne tájirıbelik turǵydan ósýine kedergi keltirdi. Sol sebepti Denıel Djeıkobs jáne Saýl Alvares onyń bokstasý mánerin, tipti kemshil tustaryn taba bildi.
Golovkın – Djeıkobs kezdesýinde qazaqstandyq boksshy sporttyq mansabynda alǵash ret 12 raýnd bokstasty. Jekpe-jekte «GGG»-dyń osal tustary ashyla bastady.
Al meksıkalyq Saýl Alvarespen bolǵan alǵashqy jekpe-jekte Golovkın óziniń joıqyn shabýylymen chempıondyq ataqtaryn sátti qorǵap qaldy. Alaıda ekinshi kezdesýde jas boksshynyń taktıkalyq jaqtan óskeni, al Golovkınniń bokstasý máneri ózgerissiz qalǵany baıqaldy. Soqqy jaǵynan alda bolsa da, Alvarestiń belsendiligi men utymdy taktıkasy tóreshilerdiń sheshimine áser etken syńaıly.
Úsh jekpe-jekte de Golovkın kóp soqqy ótkizip aldy. Jas faktory endi oǵan taktıkalyq jaqtan ósýine mumkindik bermeıdi.
Obektıvti sebepterge baılanysty Golovkınniń sporttyq mansaby sońǵy kezeńderine kelip jetti. Sondyqtan, sarapshylardyń pikirinshe, oǵan Alvarespen úshinshi jekpe-jek ótkizýge qaraǵanda, Demetrıýs Andrade (28-0,17KO) jáne Bıllı Djo Sonders (28-0,13KO) syndy chempıondardyń beldigin jeńip, boks tarıhyndaǵy óz esimin altyn árippen jazyp ketkeni kóbirek tıimdi bolar edi.
