GGG álem chempıony tıtýlynan bas tartqannan keıin Jánibek Álimhanuly qarsylasyn tańdady

ASTANA. QazAqparat – Orta salmaqtaǵy qazaqstandyq boksshy Jánibek Álimhanuly óziniń ańyzǵa aınalǵan otandasy Gennadıı Golovkın WBA Super jáne IBF nusqalary boıynsha álem chempıony tıtýldarynan bas tartýyna baılanysty pikir bildirdi, dep habarlaıdy QazAqparat.

«Golovkın meniń úlken aǵam bolǵandyqtan men onymen aıqasa almaǵanymdy bári biledi. Endi ol barlyq belbeýdi bosatty. Endi men orta salmaqtaǵy barlyq tıtýldy jınaı alamyn», - dep málimdedi Jánibek Álimhanuly óziniń Twitter jelisindegi paraqshasynda.

Sondaı-aq ol WBA jáne IBF nusqalary boıynsha tıtýldyń bolashaq ıelerimen birikken jekpe-jek ótkizgisi keletinin jetkizdi.

«Barlyq bolashaq chempıondarǵa (WBA, IBF) aıtqym keledi: Aıqasaıyq», -dep jazdy. Keıinirek Jánibek Álimhanuly WBA belbeýiniń ıegeri kýbalyq Erıslandı Laramen birlesken jekpe-jek ótkizýge nıetti ekenin aıtty.

Erıslandı Lara búgin Gennadıı Golovkın (42-2-1, 37 KO) «sýperchempıondyq» tıtýlynan bas tartqannan keıin dıvızıondaǵy jalǵyz WBA álem chempıony bolyp jarııalandy. Osydan keıin Jánibek Álimhanuly birden ony jekpe-jekke shaqyrdy.

«Meniń maqsatym 160 fýnttaǵy barlyq tıtýldy jınaý ekenin bárińiz bilesiz. Sonyń ýaqyty kelgen tárizdi. Jánibek-Lara jekpe-jegin ótkizeıik», - dep jazdy ol Twitter-de.

Jánibek Álimhanuly WBO nusqasy boıynsha álem chempıonynyń negizgi belbeýiniń ıegeri ekenin aıta keteıik.

Buǵan deıin Gennadıı Golovkın WBA nusqasy boıynsha álem chempıony tıtýlynan resmı bas tartqany habarlanǵan bolatyn. Ótken aıda Gennadıı Golovkın IBF nusqasy boıynsha da chempıondyq tıtýlynan bas tartty. Endi GGG-de negizgi chempıondyq belbeýlerdiń eshqaısysy joq. Onda tek IBO-nyń ekinshi dárejeli tıtýly ǵana qaldy.