«GGG» Alvaresti alǵashqy aıqas aldynda dopıng paıdalandy dep aıyptady
ASTANA. QazAqparat - WBA/WBC/IBF/IBO tujyrymy boıynsha orta salmaqtaǵy álem chempıony Gennadıı Golovkın 16 qyrkúıek kúni ótken alǵashqy jekpe-jekte onyń qarsylasy Saýl Alvarestiń tyıym salynǵan zattardan «taza» bolǵanyna kúmán keltirýde, dep habarlaıdy Sports.kz.
Budan buryn 17 jáne 20 aqpanda alynǵan eki dopıng-synamada «Kanelodan» klenbýterol tabylǵan edi. Biraq keıin meksıkalyq boksshy úsh ret qosymsha test tapsyryp, odan eshqandaı dopıng izi tabylmady.
«Onyń bulshyqetterinen ınektsııanyń izderi aıqyn kórinip turdy. Sýretke qarap, dárigerlerden surańyz», - dep keltiredi Los Angeles Times jýrnalısi Lens Pagmaır GGG-diń sózin.
Golovkın men Alvarestiń revanshy 5 mamyrda Las-Vegasta ótedi.
Eske salaıyq, naýryz aıynyń basynda Saýl Alvaresten alynǵan dopıng synamalardyń birinen tyıym salynǵan preparat tabyldy. Onyń múddesin qorǵaıtyn Golden Boy promoýterlik kompanııasy boksshynyń qan quramynan tyıym salynǵan preparat - Klenbýterol tabylǵany týraly aqparatty rastaǵan bolatyn.
Al keshe Golovkın dopıng daýynan keıin «Kaneloǵa» aıqasýǵa tyıym salynsa, kelesi jekpe-jegin kimmen ótkizetinin aıtty.
