GFCI reıtıngi: Astana qarjy haby retinde pozıtsııasyn kúsheıtti

Astana Global Financial Centres Index (GFCI 39) jahandyq qarjy ortalyqtary reıtınginde óz pozıtsııasyn jaqsartyp, 3 orynǵa kóterilip, álemdegi 120 qarjy ortalyǵynyń ishinde 65-oryndy ıelendi. Sonymen qatar «Astana» halyqaralyq qarjy ortalyǵy (AHQO) Shyǵys Eýropa men Ortalyq Azııa aımaǵynda birinshi oryndy senimdi túrde saqtap, kóshbasshylyqty 3 jyldan boıy nyǵaıtyp keledi.

GFCI ındeksiniń aǵymdaǵy redaktsııasy kórsetkendeı, qarjy ortalyqtarynyń kópshiliginde kórsetkishter tómendegen. Bul naqty ıýrısdıktsııalardaǵy ózgeristerden góri jahandyq keń aýqymdy ózgeristerdi kórsetedi. Osy jaǵdaıǵa qaramastan, Astananyń úsh orynǵa kóterilip, álemde 65-orynda bolýy — mańyzdy nátıje. Bul Astana qalasy men AHQO-nyń halyqaralyq qarjy qaýymdastyǵy arasyndaǵy tanymaldyǵy men senimdiliginiń artyp kele jatqanyn kórsetedi.

Sondaı-aq, respondentterdiń pikirinshe, Astana aldaǵy 2-3 jylda mańyzy arta túsetin top-5 qarjy ortalyǵynyń qataryna enedi.

— Búgin ınvestıtsııalyq sheshimderdiń negizinde turaqtylyq jáne myqty damý ınstıtýttary jatyr. Osyndaı jaǵdaıda qarjy ortalyqtary kapıtal tartýmen ǵana shektelmeı, naryqtardyń ıntegratsııasyn qamtamasyz etip, ınnovatsııalardy qoldap, halyqaralyq yntymaqtastyqty keńeıtýi tıis, — dedi «Astana» halyqaralyq qarjy ortalyǵynyń basqarýshysy Renat Bekturov.

GFCI reıtıngi jylyna eki ret jarııalanyp, álemdegi jetekshi qarjy ortalyqtarynyń damýyn kórsetedi. Ol halyqaralyq mańyzdy kórsetkishterdiń biri jáne Qytaıdyń damý ınstıtýty CDI (Shenchjen) men Z/Yen Partners (London) analıtıkalyq ortalyǵymen seriktestikte shyǵarylady. Baǵalaý bıznes orta, qarjy sektoryn damytý deńgeıi, ınfraqurylym, adamı kapıtal jáne qalalardyń bedeli sııaqty keshendi kórsetkishter negizinde qalyptastyrylady.

Bul reıtıngte 137 qarjy ortalyǵy zerttelip, olardyń 120-y negizgi ındekske kirdi. Reıtıng 147 makroekonomıkalyq kórsetkish pen onlaın saýalnamaǵa qatysqan 5,2 myń qatysýshynyń 34 myńnan astam baǵalaýyna negizdelgen. Derekkózder qatarynda Dúnıejúzilik bank, Ekonomıkalyq yntymaqtastyq jáne damý uıymy, Birikken Ulttar Uıymy bar.

Astana alǵash ret GFCI reıtıngine 2018 jyly kirdi, al aımaqtyq kóshbasshylyq mártebesi 2023 jyly bekitildi. Qala pozıtsııasyn nyǵaıtýǵa aıtarlyqtaı úles qosqan — «Astana» halyqaralyq qarjy ortalyǵy (AHQO), ol ınvestıtsııalyq jaǵymdy ortany qalyptastyryp, Qazaqstanǵa aımaqtyq qarjy haby retindegi senimdilikti arttyrady.

AHQO bıznestiń kapıtalǵa qol jetkizýin qamtamasyz etip, biregeı jumys sharttary — eń úzdik halyqaralyq tájirıbelerge negizdelgen retteý, damyǵan qarjy ınfraqurylymy, táýelsiz sot júıesi, ınnovatsııalar men qarjylyq tehnologııalardy qoldaýdy usynady. Ortalyq halyqaralyq jáne aımaqtyq naryq qatysýshylary úshin tartymdy oryn bolyp qala berip, qarjylyq qyzmetter men ınvestıtsııalyq belsendilikti damytýǵa yqpal etedi.

GFCI 39 esebi myna silteme boıynsha qoljetimdi.

Budan buryn «Astana» halyqaralyq qarjy ortalyǵynyń basqarýshysy Renat Bekturov «AHQO Qazaqstan ishindegi ofshorlyq aımaqqa aınalyp jatyr ma?» degen aıyptaýlarǵa jaýap berdi.