Geıdelbergte kólik qaqqan júrginshilerdiń arasynda qazaqstandyqtar joq
ASTANA. QazAqparat - Geıdelberg qalasynda kóliktiń qaǵyp ketýi saldarynan japa shekkenderdiń arasynda qazaqstandyqtar joq, dep habarlaıdy «QazAqparat» HAA menshikti tilshisi.
Budan buryn Germanııa polıtsııasy, Geıdelbergte pyshaqpen qarýlanǵan er adamnyń top adamdy ótpe jolda qaǵyp ketý oqıǵasyn terakti deýge dálel joqtyǵyn málimdegen bolatyn.
«Aýyr jaraqattanǵan adam Geıdelberg aýrýhanasynda 18:00-de kóz jumdy. Ol 73 jastaǵy Germanııa azamaty», delingen Geıdelberg prokýratýrasy men Mangeım polıtsııasy departamentiniń birlesken baspasóz baıanynda.
Ózge eki zardap shegýshi jeńil jaraqattanǵan. Olar - 32 jastaǵy Avstrııa azamaty men 29 jastaǵy Bosnıı jáne Gertsegovınadan kelgen áıel.
«Kúdikti 35 jastaǵy nemis bolyp shyqty. Oǵan ota jasaldy»,-dep atap ótiledi kommıýnıkede.
Qazirgi ýaqytta tergeý bul oqys oqıǵadan eshqandaı lańkestik árekettiń belgilerin taýyp otyrǵan joq.
Eske sala ketsek, BAQ-ta Geıdelberg qalasynda júrgizýshi júrginshilerdiń ótpe jolynda bir top adamdy qaǵyp ketkeni, úsh adam jaraqattanǵany týraly aqparat taraǵan edi.
Keleńsiz jaǵdaı qalanyń ortalyq Bısmarkplatts alańynda oryn aldy. Jergilikti polıtsııanyń habarlaýynsha, er adam pyshaqpen qarýlanǵan. Tártip saqshylary qashpaq bolǵan aram oılyny toqtatqan jáne atqan.
Aýyr jaralanǵan júrgizýshi aýrýhanaǵa jetkizildi. Úsh adam zardap shekken, al bireýi aýyr jaraqat alǵan.
