Geıdar Álıev jáne túrki álemi: astanada halyqaralyq konferentsııa ótti
Konferentsııany Túrki akademııasy jáne Túrki mádenıeti men murasy qory uıymdastyrdy. Sharada alǵash bolyp sóz alǵan akademııa prezıdenti Shahın Mustafaev Geıdar Álıevtiń Ázerbaıjannyń memlekettigi men túrki áleminiń ǵasyrlar boıǵy tarıhyndaǵy biregeı tulǵa ekenin atap ótti.
«Tarıh – uly adamdardyń ıdeıalary men isterine negizdelgen. Geıdar Álıevtiń esimi qazirgi Ázerbaıjannyń, onyń táýelsizdigi men básekege qabiletti memleket retinde tabysty damýynyń sımvolyna aınaldy. Geıdar Álıev halyqtarymyzdy biriktirý jáne jaqyndastyrý úshin zor kúsh jumsady», - dedi Túrki akademııasynyń prezıdenti Shahın Mustafaev.
Ol sondaı-aq, Geıdar Álıevtiń Ázerbaıjan men Qazaqstan arasyndaǵy tyǵyz qarym-qatynas, syndarly jáne ózara tıimdi yntymaqtastyq ornatý jolyndaǵy eńbegine toqtaldy.
Al, Aqparat jáne qoǵamdyq damý mınıstri Darhan Qydyráli Geıdar Alıevtiń 100 jyldyǵyna oraı derekti fılm men basqa da jarııalanymdar shyǵyp jatqanyn aıtyp ótti.
«Jaqynda eki el prezıdentteriniń kezdesýinde Memleket basshysy Qasym-Jomart Toqaev Geıdar Álıevtiń ázerbaıjan halqynyń naǵyz brendi ekenin atap ótti. Ol eki halyqty baılanystyratyn kópir sııaqty. Osy kúnge oraı, uly tulǵaǵa arnalǵan fılm ázirlendi. Sonymen qatar, bizdiń aqparattyq portaldarymyzda Geıdar Álıevtiń eńbegine qatysty materıaldar jarııalandy. Aıta ketý kerek, jaqynda ashylǵan Geıdar Álıev atyndaǵy kóshe baýyrlas elderimizdi odan ári jaqyndastyrdy», - dedi mınıstr.
Konferentsııa aıasynda «Qazaqstan» telearnasy daıyndaǵan Geıdar Álıevtiń ómiri men eńbegi týraly «Ǵazız ǵumyr» derekti fılmi qatysýshylar nazaryna usynyldy.
Eske sala keteıik, 10 sáýirde Memleket basshysy Qasym-Jomart Toqaev pen Ázerbaıjan Prezıdenti Ilham Álıev Astananyń ortalyǵyndaǵy Geıdar Álıev atyndaǵy kósheni saltanatty túrde ashqan bolatyn.
