Geroındi «lavr japyraǵy» retinde saqtaǵan adam ustaldy
PETROPAVL. QazAqparat - Petropavldyq polıtseıler 5 kg geroındi tárkiledi, dep habarlaıdy QazAqparat tilshisi.
Oblystyq ishki ister departamenti baspasóz qyzmetiniń málimdeýinshe, iri mólsherdegi esirtki tıelgen avtomashına Internatsıonalnaıa jáne Teatralnaıa kósheleriniń qıylysynda ustalǵan. Esirtki bıznesine qarsy is-qımyl bólimshesiniń qyzmetkerleri erekshe iri mólsherde esirtki zattaryn saqtady degen kúdikpen Petropavldyń úsh turǵynyn ustady.
«Tekserý kezinde avtomashınanyń artqy oryndyǵyndaǵy sómkeden «Lavr japyraǵy» dámdeýishi túrinde jasyrylǵan esirtki zattar tabyldy. Olardyń jıyntyq salmaǵy 4 kılogramm 975 gramm boldy. Sot-hımııalyq saraptamalarynan soń olardyń geroın ekeni anyqtaldy», - delingen habarlamada.
Kúdiktiler Petropavl ishki ister basqarmasynyń ýaqytsha ustaý oqshaýlaǵyshyna jiberildi. Osy is boıynsha sotqa deıingi tergep-tekserý bastalyp ketti. Polıtseıler esirtki zattardyń oblys aýmaǵyna ákelinýin egjeı-tegjeıli tekserip jatyr.
Jyl basynan beri esirtkimen baılanysty 150 quqyqbuzýshylyq tirkelip, zańsyz aınalymda júrgen 70 kılogramnan astam esirtki zat tárkilendi.
Aıta ketsek, QR ІІM resmı ókili Almas Sadýbaev Qazaqstannyń eki qalasynda esirtkiniń iri partııalarynyń tárkilengeni týraly málim etken bolatyn.
