Germanııalyq kompanııa Qazaqstanda quny 500 mln dollar bolatyn jobalardy iske asyrady
ASTANA. KAZINFORM – Memleket basshysy Linde GmbH kompanııasynyń aǵa vıtse-prezıdenti Olıver Pfanndy qabyldady, dep habarlaıdy Aqorda.
Qasym-Jomart Toqaev Linde kompanııasynyń otandyq ónerkásipti damytýǵa qosqan úlesin joǵary baǵalady.
Linde – óndiriske qajetti gazdar men ınjınırıng salasyndaǵy álemdik jetekshi kompanııalardyń biri. Kompanııanyń tehnologııasy metallýrgııa, taý-ken, hımııa, energetıka, densaýlyq saqtaý, elektronıka salalarynda jáne joǵary tehnologııalyq óndiristerde keńinen qoldanylady.
Prezıdent kompanııanyń Qazaqstanda ınvestıtsııalyq quny 500 mıllıon dollarǵa deıin baǵalanatyn birqatar jobany iske asyrý josparyn, sonyń ishinde Linde men Qarmet arasyndaǵy Temirtaý qalasynda jańa aýa bólý qondyrǵysynyń qurylysy boıynsha kelisimge qol qoıylýyn quptady.
Kezdesý barysynda munaı hımııasy ónerkásibindegi birlesken jobalardyń perspektıvasy qarastyryldy.
Memleket basshysy kómirtegin tutýǵa jáne saqtaýǵa arnalǵan Linde tehnologııalaryna aıryqsha toqtalyp, kompanııanyń sýtegi ınfraqurylymyn damytýǵa umtylysy elimizdiń «jasyl» ekonomıka standarttaryna kóshý mindetimen úndesetinine nazar aýdardy.
Bul rette Qasym-Jomart Toqaev Atyraý jáne Mańǵystaý oblystarynda munaı hımııasy men hımııa klasterin damytý qolǵa alynǵanyn atap ótti. Linde kompanııasyn keleshegi zor osy jobalarǵa atsalysýǵa shaqyrdy.
Olıver Pfann kompanııa jobalaryna qoldaý bildirgeni úshin Qazaqstan Prezıdentine alǵys aıtty. Sondaı-aq seriktestik aıasyn odan ári keńeıtýge jáne elimizde jańa óndiris oshaqtaryn ashýǵa daıyn ekenin jetkizdi.
t.me/aqorda_resmi
