Germanııanyń densaýlyq saqtaý mınıstri turǵyndardy KVI-ge qarsy vaktsına saldyrtýǵa úndedi

BRıÝSSELЬ. QazAqparat – Germanııanyń Densaýlyq saqtaý mınıstri Iens Span kúz jáne qys mezgilinde eldegi epıdemıologııalyq qaýipsizdikti qamtamasyz etý úshin taǵy 5 mıllıon turǵynǵa vaktsına saldyrtý qajet dep sanaıdy, dep habarlaıdy QazAqparat.

Nemis BAQ málimetinshe, Germanııada COVID-19 vırýsyna qarsy vaktsınalaý qarqyny baıaýlady. Osyǵan baılanysty, Germanııanyń Densaýlyq saqtaý mınıstri I.Span áleýmettik jeliler arqyly el turǵyndaryna ekpe saldyrtýǵa úndeý joldaǵan.

Germanııa azamattarynyń 65,7% vaktsınanyń bir komponentin saldyrtqan, ekpeniń eki dozasyn turǵyndardyń 61,2% (50,9 mln) aldy, dep málimdedi densaýlyq saqtaý organynyń basshysy.

«Bul – jaqsy kórsetkish, biraq kúz jáne qysta qaýipsizdikti saqtaý úshin bizge taǵy qosymsha 5 mln ekpe salý qajet», - dedi I.Span.

Ótken aptada GFP Aýrýlardy qadaǵalaý jónindegi agenttik táýligine koronavırýsqa shaldyǵýdyń 10 835 oqıǵasy týraly habarlady, budan bir apta buryn bul kórsetkish 10 303 oqıǵany kórsetken. Osylaısha, Germanııada koronavırýs kórsetkishi sońǵy aptalarda ósip, 100 myń adamǵa shaqqanda 80,7 oqıǵaǵa jetip otyr.

Bul rette mınıstr I.Span qazirgi kezde qarqyndy terapııa bólimderinde em alyp jatqan patsıentterdiń 90% qaýipti vırýsqa qarsy ekpe saldyrtpaǵanyn atap ótti.

Sondaı-aq I.Span nemis baspasózine bergen suhbatynda koronavırýsqa qarsy vaktsınalar maquldanǵanyn, olardyń qaýipsiz ári tıimdi ekenin qaıtalap ótti.

«Vaktsına qorǵaıdy, ol myńdaǵan adamnyń ómirin saqtap qalǵan», - dedi nemis mınıstri.

Avtor: Arnur Rahymbekov