Germanııanyń birqatar eldi mekenderiniń turǵyndary narazylyq sherýge shyǵatynyn málimdegen
ASTANA. QazAqparat - Daǵdarys yzǵary Germanııanyń boıyn titirkendire bastaǵan sekildi. Óıtkeni, munda áleýmetti tolǵandyrǵan máseleler jıi-jıi qylań berýde. Bul jaǵdaılar eldegi irgeli kompanııalardyń qarjy tapshylyǵymen betpe-bet kelýinen týyndap otyr, dep jazady «Egemen Qazaqstan» gazeti.
Nemis halqy maqtan etetin iri qurylymdardyń biri, elektronıka, elektrotehnıka, medıtsınalyq quraldar, elektroenergetıka óndirisi salasyndaǵy alpaýyttar qataryndaǵy Siemens kontserni qarjylyq qıyndyqtarǵa baılanysty qyzmetkerlerin jappaı qysqartatyny jaıly ashyq málimdedi. Búginde jumystan bosatý jónindegi habarlama jazylǵan paraqshalar kompanııa arqasynda nápaqa taýyp kelgen 7 800 adamǵa taratyp berilgen. Bul kontserndegi barlyq jumysshylardyń 2 paıyzyn quraıdy. Olardyń 3 myńnan astamy Germanııa azamattary kórinedi. Birinshi kezekte Siemens kompanııasynyń Erlangen qalasynda ornalasqan bólimshesindegi 900 qyzmetker óz jumysynan qol úzedi.
Jalpy, kompanııa qyzmetkerlerin qysqartý arqyly 1 mlrd. eýroǵa jýyq aqsha únemdeýdi kózdep otyr. Únemdelgen qarjy ınnovatsııalyq jobalarǵa jaratylmaq. Sońǵy derekter boıynsha, qurylymnyń tabysy jyl ótken saıyn 1-2 mlrd. eýroǵa kemip keledi.
Qazirgi tańda el halqynyń bılikke degen ókpesi qara qazandaı. Qoǵamda erteńge degen senimine selkeý túsken azamattar qatary óse túsken. Máselen, memlekettegi «Verdı» qaýipsizdik salasy qyzmetkerleriniń odaǵy narazylyq sharalaryn ótkizetinderin habarlady. Bul ereýilge Gambýrg, Shtýtgart jáne Gannover áýejaılarynyń jumysshylary da qoldaý bildirgen. Munyń saldarynan 80 myńǵa jýyq jolaýshy zardap shegýi múmkin. Atalmysh kásipodaq qaýipsizdik salasy qyzmetkerleriniń jalaqysyn ósirýdi talap etýde.
Bylaıǵy jurtqa Germanııada bári óz qalpynda sekildi kórinedi. Alaıda, eldiń syrtqy jáne ishki jaǵdaıy sonshalyqty máz emes. Buǵan memlekettiń birqatar odaqtastarynyń basyna túsken aýyrtpalyqtar tikeleı áser etip otyrǵany belgili.
