Germanııany 2:0 esebimen jeńgen Frantsııa quramasy Eýro-2016 fınalyna ótti
ASTANA. QazAqparat - Fýtboldan Frantsııa ulttyq quramasy óz jerinde ótip jatqan Eýropa chempıonatynyń fınalyna shyqty. Dıde Desham jattyqtyratyn komanda jartylaı fınalda Germanııa quramasyn jarys jolynan shyǵardy, dep jazady massaget.kz.
Frantsýzdar oıyndy shıraq bastap, nemisterdi alǵashqy mınýttardan qysymǵa alǵan-dy. Alaıda birinshi taımnyń orta tusyna qaraı Germanııa quramasy dop ustaý men shabýylda belsene tústi. Al birinshi taım aıaqtalar tusta Bastıan Shvaınshtaıger óz aıyp alańynda dopty qolyna tıgizip aldy. Nátıjesinde ıtalııalyq tóreshi Nıkola Rıtsollı az-kem oılanyp, sońynda penaltı belgiledi. 11 metrlik aıyp soqqysynan Antýan Grızzman múlt ketken joq.
Ekinshi taımda da nemister alǵa umtylyp, tarazy basyn teńestirýge umtyldy. Dese de qarymta shabýylda alań ıeleriniń adýyny baıqaldy. 72 mınýtta Ioahım Lev jattyqtyratyn komandanyń qorǵaýshylary qatelesip,Antýan Grızmannyń dýbl avtory atanýyna jaǵdaı jasady. Pol Pogbanyń dobyn Manýel Noıerqaıtarǵanmen, chempıonattyń úzdik surmergeni (6 gol) atanyp kele jatqan Antýan dopty qaqpa torynda týlatty. Odan keıingi aralyqta Germanııa quramasy bar kúshin shabýylǵa salǵanmen, gol soǵa alǵan joq.
Frantsııa quramasy fınalda Portýgalııa quramasymen oınaıtyn bolady. Krıshtıaný Ronaldý bastaǵan jigitter jartylaı fınalda Ýels quramasyn utqan bolatyn. Fınaldyq kezdesý 10 shilde kúni ótedi.
