Germanııanyń jańa úkimeti bosqyndar sanyn azaıtýdy josparlap otyr

ASTANA. KAZINFORM – Hrıstıan-demokratııalyq odaq (HDO) jetekshisi Frıdrıh Merts Germanııa úkimetiniń jyl saıyn 100 myńnan aspaıtyn yqtımal bosqyndardy elge kirgizý jospary bar ekenin málimdedi, dep habarlaıdy TASS.

— Bizdiń ıdeıamyz – bul kórsetkishterdi qazir kúrt qysqartý. Bul endi alty tańbaly san bolmaýy kerek. Qalalar, mýnıtsıpalıtetter, mektepter, aýrýhanalar men jalpy ınfraqurylym shamadan tys júktelgen, — dedi Frıdrıh Merts ARD telearnasynda bergen suhbatynda.

HDO jetekshisiniń aıtýynsha, osy sebepti jańa úkimettik koalıtsııa kelisiminde kórsetilgendeı, Germanııa úkimeti repatrıatsııany (elge oralýdy) jáne otbasy múshelerin qosý baǵdarlamasyn ýaqytsha toqtatýdy josparlap otyr.

Sol ýaqytta Merts bosqyn mártebesin suraýshylarǵa elge shekarada kirgizbeı-aq, birden bas tartý maqsatyn rastady.

— Bul júzege asady, — dep sendirdi ol.

Bul máselede kórshi memlekettermen úılesimdi áreket etý jumystary koalıtsııalyq kelisim aıasynda bastalyp ketkenin aıtty. Ol yntymaqtastyqqa úmit bildirdi.

— Men Avstrııa úkimeti de bul máseleni biz sııaqty sheshýge múddeli dep oılaımyn, — dep qorytyndylady ol.

Frıdrıh Mertstiń Býndestagta kantsler retinde saılanýy 6 mamyrǵa josparlanǵan. 9 sáýirde ol jańa úkimettiń mıgratsııalyq saıasatty edáýir qatańdatatynyn málimdegen bolatyn.

Buǵan deıin Germanııa BUU jelisi arqyly bosqyndardy qabyldaýdy ýaqytsha toqtatqan edi.