Eýropalyq Spectrum zymyrany alǵash ret Jer orbıtasyna shyqty
ASTANA. KAZINFORM – Germanııanyń Isar Aerospace ǵarysh startapy jasaǵan Spectrum zymyran tasyǵyshy Norvegııadaǵy Anneııa ǵarysh aılaǵynan ushyrylyp, Jer orbıtasyna sátti shyqty, dep habarlaıdy DIE ZEIT.
Bul – Eýropa qurlyǵynan jeke kompanııa ázirlegen zymyrannyń orbıtaǵa alǵash ret jetýi. Isar Aerospace muny eýropalyq ǵarysh salasy úshin tarıhı oqıǵa dep atady.
Spectrum Norvegııanyń soltústigindegi Anneııa ǵarysh aılaǵynan 5 qyrkúıek kúni ushyryldy. Bul zymyrannyń ekinshi synaq ushyrylymy boldy. Onyń bortynda bes shaǵyn jerserik pen bir tehnologııalyq eksperıment boldy.
Alǵashqy synaq 2025 jylǵy naýryzda ótken edi. Ol kezde zymyran ushyrylǵannan keıin shamamen 30 sekýndtan soń basqarýdan aıyrylyp, teńizge qulaǵan. Kompanııa keıin apattyń sebepterin zerttep, Spectrum júıesine birqatar ózgeris engizdi.
Spectrum – uzyndyǵy 28 metr bolatyn eki satyly zymyran. Ol tómengi Jer orbıtasyna 1 tonnaǵa deıin júk jetkizýge arnalǵan.
Isar Aerospace Eýropanyń ǵaryshqa óz betinshe shyǵý múmkindigin keńeıtýdi jáne shaǵyn ári orta kólemdegi jerserikterdi kommertsııalyq negizde orbıtaǵa jetkizýdi kózdeıdi. Kompanııa aldaǵy ýaqytta jylyna 40-qa deıin zymyran shyǵarýdy josparlap otyr.
Eske sala ketsek, buǵan deıin SpaceX AQSh-ta Starship-ke arnalǵan jańa ǵarysh aılaǵyn salatynyn jazdyq.
