Germanııanyń soltústiginde qus tumaýy órship barady

ASTANA. KAZINFORM – Qanattylarda kezdesetin H5N1 vırýsy Germanııanyń federaldyq aýmaǵy sanalatyn Meklenbýrgte – Aldyńǵy Pomeranııadaǵy eki qus fermasynda anyqtaldy, dep habarlaıdy Kazinform agenttigi DW-ge silteme jasap.

Endi bul fermalardaǵy 150 myń taýyq joıylýy tıis, dep jazdy Tagesschau Germanııanyń Aýyl sharýashylyǵy mınıstrliginiń ókiline silteme jasap.

Kúzdiń túskeli osy aımaqta úı qustary arasynda qus tumaýynyń bes oshaǵy tirkeldi, al jyl basynan beri mundaı jaǵdaılardyń jalpy sany toǵyzǵa jetken. H5N1 vırýsy sondaı-aq jabaıy qustarda, ásirese tyrnalarda jıi anyqtalyp jatyr.

Jergilikti Aýyl sharýashylyǵy mınıstrligi qus ósirýshi fermerlerdi erekshe qyraǵylyq tanytýǵa shaqyrdy. Atap aıtqanda, eger taýyqtar jıi óle bastasa, azyq pen sýdy az ishse nemese jumyrtqa salýy nasharlasa, dereý veterınarlyq qyzmetke júginýge keńes berildi.

Eske sala ketsek, buǵan deıin Pavlodar aımaǵynda joǵary patogendi qus tumaýy taralýy múmkin ekenine jazǵanbyz.

Al maýsym aıynda Qazaqstan joǵary patogendi qus tumaýynan taza el mártebesine ıe bolǵan.