Germanııanyń Syrtqy ister mınıstri mindetti áskerı boryshty qaıta engizýdi qoldady

ASTANA. KAZINFORM —  Germanııanyń Syrtqy ister mınıstri Iohann Vadefýl elde mindetti áskerge shaqyrýdy dereý qaıta engizýdi jaqtaıtynyn málimdedi, dep habarlaıdy TASS. 

— Men áskerı mindetti dereý engizýdi qoldaımyn, — dedi mınıstr. 

Ol osy máseleni birneshe ret kótergenin eske saldy.

— Alaıda biz bul suraqty koalıtsııa ishinde talqylaýǵa májbúrmiz. Úkimet óz usynystaryn jarııalady, endi parlamenttegi fraktsııalar kelissózder júrgizip, zańnyń qandaı bolatyny jóninde sheshim qabyldaýy tıis. Sonymen qatar barlyq jaǵdaıdy eskerý qajet, — dep túsindirdi Vadefýl.

Kútilip otyrǵandaı, Býndestag aldaǵy aptada Germanııadaǵy áskerı qyzmettiń jańa úlgisi jónindegi zań jobasyn alǵash ret talqylaıdy. Germanııa Qorǵanys mınıstrligi Býndesverdiń sanyn 260 myń áskerı qyzmetkerge, al rezervin 200 myń adamǵa deıin arttyrýdy kózdep otyr.

27 tamyzda Germanııa úkimeti Qorǵanys mınıstri Borıs Pıstorıýstyń jańa áskerı qyzmet úlgisin qarastyratyn zań jobasyn qabyldaǵan edi. Ol Shvetsııa tájirıbesine negizdelgen erikti qyzmet modelin usynady. Bul elde barlyq mektep túlekteri medıtsınalyq tekseristen ótedi, alaıda olardyń bir bóligi ǵana áskerge alynady.

Qujatta mindetti túrde oryndalatyn baptar da bar. Atap aıtqanda, áskerge shaqyrylýshylardy qaıta medıtsınalyq tekserýden ótkizý jáne 18 ben 25 jas aralyǵyndaǵy er azamattarǵa áskerı qyzmetke daıyndyq jaıly ótinish toltyrý mindeti engizilgen. Zań jobasynda jalpyǵa ortaq áskerı mindetti qaıta engizý múmkindigi de joqqa shyǵarylmaǵan.

Germanııada mindetti áskerı borysh 2011 jyldyń shildesinde kúshin joıyp, el kásibı armııa júıesine kóshken bolatyn. 

Aıta ketelik Germanııada jasy 100-den asqan adamdardyń sany artqany týraly jazǵan edik.