Germanııanyń syrtqy ister mınıstri BUU Bas Assambleıasynyń prezıdenti qyzmetin atqarady
ASTANA. KAZINFORM — 2025–2026 jyldary BUU Bas Assambleıasynyń prezıdenti qyzmetin dıplomat Helga Shmıd atqarýy tıis edi, alaıda onyń ornyna bul laýazymǵa Germanııanyń syrtqy ister mınıstri Annalena Berbok taǵaıyndaldy, dep habarlaıdy Bild.
Beıresmı túrde BUU-ǵa nemis kandıdatyn taǵaıyndaý týraly sheshim qazirdiń ózinde qabyldandy, al daýys berý tek formaldy bolady.
Annalena Berbokty taǵaıyndaý týraly sheshim Germanııada qatty synǵa ushyrady, óıtkeni ol bılik aýysqannan keıin jáne «Jasyldar» úkimetten ketken soń qabyldandy.
Buǵan deıin qarastyrylǵan 64 jastaǵy Helga Shmıd halyqaralyq dıplomatııada mol tájirıbege ıe. Ol Eýropalyq syrtqy baılanystar qyzmetinde mańyzdy laýazymdar atqarǵan, Iranmen ıadrolyq kelissózderde EO-nyń bas kelissóz júrgizýshisi bolǵan jáne 2020-2024 jyldary EQYU-nyń bas hatshysy qyzmetin atqarǵan. Endi BUU-daǵy qyzmetten bas tartqan soń, ol Mıýnhendegi qaýipsizdik konferentsııasynda jumysyn jalǵastyrady.
BILD basylymynyń málimetinshe, Shmıd bul qyzmetke taǵaıyndalmaıtynyn tek sońǵy sátte bilgen, al Batys Eýropa elderi bul laýazymdy aldyn ala Germanııamen kelisken. Dıplomatııalyq ortada taǵaıyndaýlardyń ózgerýi múmkin ekeni aıtylǵanymen, buǵan deıin BUU Bas Assambleıasy tóraǵasy laýazymyna eshqashan qyzmettegi mınıstr taǵaıyndalmaǵan.
Berbok óziniń taǵaıyndalýyn qorǵaı otyryp, buǵan deıin syrtqy ister mınıstrleri men premer-mınıstrlerdiń de osyndaı qyzmetterdi atqarǵanyn alǵa tartty. Onyń aıtýynsha, halyqaralyq turaqsyzdyq jaǵdaıynda BUU «burynǵydan da mańyzdy», sondyqtan Germanııa onda erekshe jaýapkershilik alady.
Aqpanda Germanııada Býndestagqa kezekten tys saılaý ótti.