Germanııanyń Saarbrıýkken qalasynda Qazaqstannyń Qurmetti konsýldyǵy ashyldy
ASTANA. KAZINFORM — Germanııa Federatıvtik Respýblıkasynyń Saar federaldyq jerindegi Saarbrıýkken qalasynda Qazaqstannyń Qurmetti konsýldyǵynyń saltanatty ashylý rásimi ótti, dep habarlaıdy QR SІM baspasóz qyzmeti.
Іs-shara Saardyń Saýda-ónerkásip palatasynyń (IHK Saarland) ǵımaratynda uıymdastyrylyp, Qazaqstan men Germanııa arasyndaǵy óńirlik deńgeıdegi qarym-qatynastardy damytý jolyndaǵy mańyzdy qadamnyń biri boldy.
— Qazaqstannyń Saarbrıýkken qalasyndaǵy Qurmetti konsýly bolyp Saar jeriniń Saýda-ónerkásip palatasynyń Bas dırektory Frank Tome taǵaıyndaldy. Onyń halyqaralyq ekonomıkalyq yntymaqtastyq salasyndaǵy mol tájirıbesi Qazaqstan men Saar federaldyq jeri arasyndaǵy saýda-ınvestıtsııalyq baılanystardy nyǵaıtýǵa yqpal etetin bolady, — delingen mınıstrlik taratqan aqparatta.
Qazaqstannyń Germanııa Federatıvtik Respýblıkasyndaǵy elshisi Nurlan Onjanov Qurmetti konsýldyqty ashý barysynda Qazaqstan men Germanııa arasyndaǵy strategııalyq seriktestiktiń joǵary deńgeıin atap ótti. Ol óńirlik ózara is-qımyl men iskerlik baılanystardyń mańyzdylyǵyna toqtalyp, Qurmetti konsýldyqtyń ekonomıkalyq, ınvestıtsııalyq, gýmanıtarlyq jáne óńirlik yntymaqtastyqty damytýdaǵy tıimdi tetik bolatynyna senim bildirdi.
Saar federaldyq jeriniń Premer-mınıstri Anke Relınger Qazaqstandy Germanııanyń Ortalyq Azııadaǵy senimdi seriktesi ekenin atap ótip, ónerkásip, energetıka, ınnovatsııalar, tsıfrlandyrý jáne kásiptik bilim berý salalaryndaǵy keń aýqymdy ózara is-qımyl múmkindikterine nazar aýdardy. Ol Qurmetti konsýldyqtyń qyzmetin qoldaıtynyn bildirip, onyń iskerlik jáne qoǵamdyq orta arasyndaǵy tikeleı baılanystardy damytýdaǵy mańyzdy alań retindegi rólin erekshe atap ótti.
Saar jeriniń Saýda-ónerkásip palatasynyń Prezıdenti Hanno Dornsaıfer óz sózinde Qazaqstanmen iskerlik yntymaqtastyqty keńeıtýge óńir kásipkerleriniń joǵary qyzyǵýshylyq tanytyp otyrǵanyna nazar aýdardy.
Saltanatty rásimniń negizgi sáti Qazaqstannyń Saarbrıýkken qalasyndaǵy Qurmetti konsýly Frank Tomege konsýldyq patenttiń tabystalýy boldy. Ol óz sózinde kórsetilgen senim úshin alǵysyn bildirip, Qazaqstan men Saar óńiri arasyndaǵy ekonomıkalyq, mádenı, gýmanıtarlyq jáne óńirlik yntymaqtastyqty damytýǵa belsendi túrde atsalysatynyn jetkizdi.
Qazaqstannyń Saarbrıýkken qalasyndaǵy Qurmetti konsýldyǵynyń ashylýy Astana men Berlın arasyndaǵy qatynastardy odan ári nyǵaıtýǵa, sondaı-aq Qazaqstannyń Saar federaldyq jerimen áriptestigin keńeıtýge jańa múmkindikter ashady.
Budan buryn Qazaqstannyń Reseıdegi elshiligindegi konsýldyq alymdar jańartylǵanyn jazdyq.