Germanııanyń iri týrızm qaýymdastyǵy Qazaqstanda forým ótkizedi
ASTANA. KAZINFORM — Álemdegi eń iri týrıstik kórmelerdiń biri — ITB Berlin aıasynda QR Týrızm jáne sport mınıstrligi Deutscher Reiseverband (DRV) uıymymen yntymaqtastyq týraly memorandýmǵa qol qoıdy, dep habarlaıdy mınıstrliktiń baspasóz qyzmeti.
Qazaqstannyń ulttyq stendinde kelý týrızmimen aınalysatyn 21 týroperator, qonaqúı bıznesiniń ókilderi, qazaqtyń ulttyq ashanasyn usynatyn meıramhanalar jáne elimizdiń 6 óńiri tanystyrylyp jatyr.
Sonymen qatar, eldiń gastronomııalyq áleýeti Sandyq Group restorandar jelisiniń qoldaýymen tanystyryldy. Kelisimge sáıkes, bıyl tamyz aıynda Astanada DRV Destination Forum ótedi.
Baǵdarlama aıasynda Qazaqstannyń týrıstik múmkindikteri tanystyrylyp, nemis týroperatorlarymen B2B formatyndaǵy kelissózder uıymdastyrylady, sondaı-aq eldiń negizgi týrıstik baǵyttary men ınfraqurylymy kórsetiledi.
Forým Qazaqstannyń týrıstik ónimderin Germanııa naryǵyna engizýdiń tıimdi tetigi bolady.
— Kelisimniń negizgi maqsaty — Qazaqstanǵa arnalǵan týrlardy Germanııanyń iri týroperatorlarynyń katalogyna engizý jáne olardy Germanııa naryǵynda belsendi nasıhattaý. DRV forýmy — eki eldiń týrızm salasyndaǵy yntymaqtastyǵynyń jańa deńgeıge kóterilgenin kórsetetin mańyzdy qadam, — dedi QR TSM Týrızm ındýstrııasy komıtetiniń tóraǵasy mindetin atqarýshy Nurbol Baıjanov.
Aıta keteıik, ITB Berlin — jahandyq týrızm ındýstrııasynyń jetekshi iskerlik alańy. Kórmege qatysý Qazaqstannyń Eýropa naryǵyndaǵy pozıtsııasyn nyǵaıtady. Mysaly, 2025 jyly Qazaqstanǵa Germanııadan shamamen 100 myń týrıst kelgen.
Memorandýmǵa qol qoıý jáne forýmdy ótkizý — halyqaralyq seriktestikti keńeıtý, kelý týrızmin ártaraptandyrý jáne Qazaqstannyń básekege qabiletti týrıstik ári iskerlik baǵyt retindegi mártebesin kúsheıtýge baǵyttalǵan júıeli jumystyń aıqyn kórinisi.
DRV — Germanııadaǵy salalyq týrıstik qaýymdastyq. Oǵan 3 000-nan astam kompanııa múshe bolyp, Germanııa azamattarynyń uıymdastyrylǵan saparlarynyń shamamen 90%-yn qamtıdy. Qaýymdastyq salalyq kún tártibin qalyptastyryp, eldiń týrıstik saıasatynyń damýyna yqpal etedi ári halyqaralyq týrızm naryǵynda mańyzdy ról atqarady.
Osyǵan deıin Germanııanyń Saarbrıýkken qalasynda Qazaqstannyń Qurmetti konsýldyǵy ashylǵanyn jazǵanbyz.